Messi prestu in difficultà dopu à un rigore, i Gazieri sò riesciuti à vultà a situazione à a fine di a partita per impone si 2-1 nant’à u terrenu di u FC Metz grazia à una doppietta di Vassency Diomandé.
METZ – GFCA : 1-2 (1-0)
But di Metz : Guerti (5e sp.)
But di Aiacciu : Diomandé (76e, 84e)
Avertimenti :
-
Metz : Pandore (45e), Guerti (57e), Ba (73e), Lawson (83e)
-
Aiacciu : Pomponi (35e), Vitini (45e), Fiori (49e), Fogacci (52e)
GFCA : Foggacci ; Mersini (Diomandé, 63e), Duma, Vittini, Fiori (Bonalair, 53e) ; Kheroua (Souid Ahmed, 53e), Al-Djellal (Kabamba, 72e), Founou ; Pomponi, Randazzo.
U GFCA ùn avia principiatu a partita di a manera a più bona quandu Foggacci facia cascà l’attaccante messinu è cuncedia un rigore dopu à solu cinque minuti di ghjocu. Guerti cunvertia (1-0, 5e). In seguita, Gnemgnon avia l’occasione di raddoppià a marca ma u so tiri passava à cantu di i pali corsi (8e).
Pianu pianu, i Gazieri entravanu in a partita. Prima nant’à un colpu francu eccentratu chì obligava Ba à respinghje (11e), dopu nant’à un but ricusatu per fora di ghjocu di Randazzo (25e).
Foulon pruvava torna davanti à Ba, nanzu chì l’arrosu automaticu suspendissi a partita una decina di minuti (45e+4). Fogacci salvava torna nant’à un colpu francu di Guerti, purtendu i Gazieri à a pausa (45e+12).
« Avemu pigliatu u cuntrollu di u ghjocu à partesi da a vintina minuta, è dopu ùn avemu più patitu. Simu stati bè piazzati difensivamente è ci simu fattu cuglieri à fredu. Ma avemu rispostu », spiegava l’allinatore Huet.
Bisugnava però aspettà torna un pocu. U centru di Souid Ahmed, appena entratu, obligava Ba à intervenì davanti à Randazzo (54e), è Fogacci era sempre impassibile nant’à a so linea davanti à Guerti (59e).
« Avemu assai suffertu contr’à Amiens è avemu tenutu u puntu, quì avemu riesciutu à fà a diffarenza à a fine è què face vede a qualità di u nostru gruppu » aghjunse u tecnicu di u Gazelec.
A liberazione ghjunse cù Diomandé, appena entratu anch’ellu. Nant’à un strappu di Randazzo dapoi i 30 metri, ripigliava perfettamente per ugualizà (1-1, 76e).
À partesi da tandu, Fogacci sapia ch’ellu bisognava tene i segni, è hè Diomandé torna chì purtava a vittoria. Souid Ahmed perforava u mezu avversu è trasmettia à Randazzo chì lasciava à Diomandé, u quale piazzava u so tiri à i pedi di Ba (1-2, 84e).
U GFCA piglia a prima piazza di u girone.
