A Cummissione federale di disciplina di a Fédération Française de Football hà resu a so decisione in quantu à a partita di National 3 trà u Gazélec Football Club Ajaccio è u Pays du Valois, interrotta u 13 di ferraghju 2026. U club corsu si vede attribuisce a vittoria nantu à u tappettu verde, a rispunsabilità di l’incidenti essendu ricunnisciuta à u club ricevitore.
A decisione era attesa. Hè oramai ufficiale. A Cummissione federale di disciplina di a Fédération Française de Football hà decisu in u cartulare di a partita di National 3 chì oppunia u Pays du Valois à u Gazélec Football Club Ajaccio, interrotta à l’ultimi mumenti u 13 di ferraghju 2026.
Mentri a partita ghjunghjia à a so fine, incidenti seri avianu purtatu l’arbitru à interrompe definitivamente u scontru. Un spettatore era entratu in a zona di ghjocu per spinghje un ghjucatore aiaccinu, prima ch’un oggettu fussi lanciatu da e tribune. Toccatu à a testa, u ghjucatore di u GFCA Max Bonalair hè statu pigliatu in carica da i servizii di soccorsu è dopu evacuatu versu l’uspidale, cù dece ghjorni d’incapacità tutale di travagliu prescritti.
Di pettu à issi elementi, a cummissione hà stimatu chì a rispunsabilità di u club ricevitore era ingagiata. Hà dunque decisu d’attribuisce a vittoria à u Gazélec Football Club Ajaccio per penalità. Inoltre, nisuna rispunsabilità disciplinaria ùn hè stata ritenuta contr’à u club corsu, i so ghjucatori o u so staff.
Solu u ghjucatore Max Bonalair hè statu sanzionatu cù una partita di sospensione per un cumpurtamentu cunsideratu inappropriatu nanzu à l’incidenti.
In un cumunicatu, u Gazélec Football Club Ajaccio hà fattu sapè ch’ellu « piglia attu » di sta decisione, ramintendu u so impegnu custante à prò di i valori di rispettu, d’integrità è di securità, nant’à è fora di u terrenu. U club mette in risaltu chì sta decisione « cunfirma a gravità di i fatti accaduti » è insiste nant’à a necessità di prutege tutti l’attori di u ghjocu.
U Gazélec Aiacciu afferma vulè cuntinuà u so impegnu per chì tali incidenti ùn si ripetinu più, è cuntinuerà à difende cù determinazione i so ghjucatori, u so staff è i so sustenidori.
