Cù sta nova disfatta per 3 à 0 in casa contr’à Amiens, u Sporting Club di Bastia hà torna dimustratu a so difficultà à impone si in Furiani. U bilanciu di stu principiu di stagione di Liga 3 in casa hè pesante : trè disfatte è ottu rete incasciate. Cumu si pò spiegà ?
Una rete incasciata dopu solu 45 seconde di ghjocu, un autogol è un sintimu d’impotenza durante guasi tutta a partita, fora di qualchì rara eccezzione…
Stu sabbatu, contr’à Amiens, per u so ritornu in Furiani, u publicu bastiacciu hè statu, per cusì dì, servutu. U spettaculu prupostu da i Turchini hè statu mediocre è u scenariu assai sfavurevule : « Ci avvelenemu a vita dopu solu 45 seconde. Mettimu in piazza un scenariu chì ùn ci cunvene mancu appena è chì ci taglia e ghjambe », spiega Laurent Peyrelade, l’allenadore bastiacciu.
Stu filmu, in Furiani, si cumencia à cunnosce : Le Puy-en-Velay, Versailles è avà Amiens. « Tiremu vinti volte, ma ci manca a precisione in l’ultimi trenta metri avversi. »
Tandu, una volta di più, si parla di currege u tiru : « Cuntinuà à travaglià, à affinà i nostri aghjustamenti difensivi è à truvà u bon equilibriu in a squadra. » Hè u cutidianu di tutte e squadre di ballò. Eppuru, l’allenadore schjarisce un pocu di più certe quistione.
S’è, cum’ellu a dice ellu stessu, contr’à Amiens certe cose dipendenu da ellu, cum’è u fattu d’ùn avè trovu « nè u bon equilibriu, nè e parolle ghjuste per esse efficaci in e duie zone », d’altre dipendenu da l’ondeci ghjucadori prisenti nant’à u terrenu : « Nant’à una rimessa longa, ci vole à esse megliu piazzati è più attenti », o ancu : « Avemu un livellu individuale chì sparisce da una partita à l’altra. »
È l’infernu ùn sò micca l’altri, cum’ellu scrivia Jean-Paul Sartre, ma piuttostu u stadiu Armand-Cesari di Furiani. Eppuru, sta squadra bastiaccia ci hà cunnisciutu tutte e cunfigurazioni pussibule : cù o senza sustenidori, cù a canicula o senza, è contr’à avversarii di livelli sfarenti. S’è a risposta fussi cusì simplice, basteria à spiazzà a partita qualchì centinaia di metri più in là, à u stadiu d’Erbaghjolu, per rompe a maledizzione.
Cambiamentu d’allenadore, cambiamentu di squadra, è puru ferma l’impressione di rivive sempre a listessa storia d’Un ghjornu senza fine, da a Liga 2 à a Liga 3. À chì assumiglierà u seguitu di a stagione ? Nant’à u pianu spurtivu, Laurent Peyrelade ùn hà altra scelta chè di « travaglià è allenà si per fà megliu a settimana chì vene » è di « dumandà più attenzione à i ghjucadori sperimentati, affinch’elli accumpagninu i più giovani ».
Stu sabbatu in Furiani, un novu gruppu di sustenidori, « I Guardiani », hà fattu a so apparizione. S’elli anu cuntinuatu à sustene i ghjucadori ancu dopu à a prima rete, i canti si sò zitti è a tribuna s’hè viutata dopu à a terza. Parechje bandere anu dinù dumandatu più ambizione è più identità.
L’allenadore bastiacciu hà spiegatu di capisce a so delusione, prima d’aghjunghje : « Avemu un gruppu ghjovanu è ristrettu. Ci seranu mumenti difficiuli durante a stagione. Vinceremu partite è ne perderemu. Ùn serà micca una strada diritta. Parechji ghjucadori anu datu assai sta sera. Ci sò dinù prestazioni pusitive. Averemu bisognu di u publicu, perchè cunnisceremu altri mumenti difficiuli durante a stagione. Ci vole à dà prova di benevulenza è di pacienza. Hè necessariu. »
U Sporting Club di Bastia si spiazzerà nant’à u terrenu di Bourg-Péronnas per a sesta ghjurnata di Liga 3, u 12 di settembre chì vene à 2 ore è 45 di dopu meziornu.
