A squadra aiaccina hà ripigliatu a strada di l’allenamentu stu marti, dopu à una longa pausa. Oramai impegnatu in D2, u club gazieru punta nant’à a ghjuventù cù a speranza di ghjucà i primi posti di a classifica
Un pocu più di cinque mesi fà, i ghjucadori di u GFCA s’eranu affundati nant’à u parquet di Poitiers, dopu à un’ultima disfatta chì ufficializava a so retrocessione in Liga B. Stu marti, si trattava di u so ritornu à l’allenamentu, o piuttostu di u principiu di a so preparazione di pre-stagione in l’anticamera di l’elita, chjamata oramai D2. Per sta prima presa di cuntattu, i Diavuli Rossi avianu appuntamentu à u gymnase di Pitrusedda, per via di l’indispunibilità pruvisoria di u Palatinu.
A scumessa di a ghjuventù
Dopu à a retrocessione, l’effettivu gazieru hè per forza cambiatu assai. Parechji visi novi anu fattu a so apparizione, frà i quali quellu d’un anzianu di ritornu : Sebastian Roatta.
« U nostru sestettu iniziale hè cambiatu cumplettamente. Ci hè un gruppu sanu da ricustruisce. Ripartimu da una pagina bianca. Facemu a scumessa di a ghjuventù nant’à un periudu chì duveria stende si nant’à trè anni. Ma speremu d’ùn sbaglià ci, perchè sapemu bè chì simu un club chì ùn hà micca dirittu à l’errore », hà spiegatu l’allenadore aiaccinu Frédéric Ferrandez.
