Dighjà vittoriosu l’annu scorsu in Mezzavia, l’atletu francese s’hè chjappu, torna una volta a ghjustra internaziunale d’Aiacciu issa dumenica dopu meziornu. Hà pigliatu a suprana, in menu di duie ore, nantu à l’Australianu Blake Ellis. Quellu hà vintu u doppiu…
Ghjocu di qualità, partite abbastanza strette, ambianza bona, publicu allegru, nulla ùn n’hà mancatu à l’occasione di a dodecesima ghjustra internaziunale d’Aiacciu by Vito chì s’hè tenuta tutta a settimana, in u TC di Mezzavia è a so squadra cunduta da Antone Fanchi. U ricordu di Vincente Castola, u presidente sparitu questu annu era sempre quì, à mezu à tutti, dirigenti, benevulenti, ghjucadori. Nantu à i dui corti di u club, dui ghjorni dedicati à e qualificazione è a ghjustra finale à partesi di l’ottesime di finale. U publicu avia un sguardu particulare nantu à Pierre-Antoine Tailleu, ghjovanu finaliste di u doppiu l’annu scorsu. Di fronte à Kenny de Scheeper, chì dopu s’hè chjappu à Antoine Escoffier, numeru unu di a manifestazione, ùn hà pussutu fà nulla malgratu una bella resistenza (6-3, 6-4). Listessu per Bastien Prod’homme, campione di Corsica 2024 chì hà persu di fronte à Loris Pourroy (6-0, 6-1). Finalemente, u Bastiacciu Laurent Lokoli, chì face parte hè vera, di u percorsu prufessiunale, fù u solu corsu à pudè francà l’ottesime di finale. Ma, peccatu, hè cascatu, in quartu, nantu à Jules Marie, campione l’annu scorsu. Un maccione di trè ore trà i dui atleti ma, in fine a vittoria per u Francese, più cumplettu (7-5, 5-7, 7-5). A surpresa hè ghjunta da Antoine Escoffier, numeru unu, chì hà persu à u primu giru di fronte à Kenny De Schepper. Cusì, in mezu finale, avemu ritruvatu dui atleti australiani (Blake Ellis è James Mac Cabe), unu di u Zimbabwée è Jules Marie ghjuntu à difende u so titulu. In a prima meza finale, Ellis hà pigliatu a suprana nantu à u so avversariu ma in guasgi trè ore di ghjocu (4-6, 6-4, 7-5). Una furmalità per Jules Marie contru à James Mac Cabe (6-2, 6-4). U Francese, famosu youtubeur d’altronde, hà cuntinuatu in finale. Una vittoria (6-2, 6-3) è 25 punti chì li aprenu e porte, dopu à l’Australia, Roland Garros è Wimbledon, di l’US Open à a fine d’aostu. L’urganizatori, elli, travaglianu dighjà nantu à l’edizione 2025.
