Per a prima volta di a stagione, a squadra aiaccina hà riesciutu à vince duie volte di fila. Dopu à u sucessu in Timizolu, u dui di nuvembre, a vittoria di fronte à Troyes, vennari scorsu in Mezavia hà datu, forse, a cunferma chè u GFCA ripiglia fiata in a cumpetizione. Cù a strategia d’Hervé Della Maggiore chì porta, dighjà, i so frutti…
U stintu, a manera, duie belle realisazione, eccu ciò chì era u bilanciu di u Gazelec nantu à u terrenu di l’ACA u dui di nuvembre scorsu. Una prima vittoria dopu à una « sicchina » di guasgi dui mesi. Ma si sà, quantunque, chè un macciu di fronte à u « nemicu » hè sempre particulare. I sustenitori rossi è turchini aspettavanu una cunferma di fronte à Troyes, una squadra chì passa per svilluppà un bellu ghjocu.
Torna una volta, a risposta hè ghjunta da u terrenu. Senza esse tremende, u GFCA hà pigliatu issu macciu in un sensu bonu. U stintu, a voglia, sfide vinte, u spiritu rossu è turchinu, paria ch’è noi fussimu in i tempi in più gloriosi di u Gazelec. Una perfurmanza assai rialzata chè issa squadra di Troyes ùn era a prima…
Un maccione, dunque, per l’omi d’Hervé Della Maggiore, un penalty di Jimmy Roye, vultatu à un postu di capighjucadore chì li curresponde forse megliu, una realisazione di Jérémy Blayac, mutu dapoiu principiu di a stagione, e corse di Gomis nantu à u fiancu manca, l’intervenzione pulite di Campanini, en rilancie di Guidi, a vista di Pierazzi, nulla ùn hè mancatu per issa vittoria. Fora d’una realisazione avversa à sette minute di a fine chì hà messu un pocu di pressione, una partita riferenza per l’addestradore novu chì marca, ellu dinò, u so territoriu. Prussimu appuntamentu per i diavuli rossi, issa dumenicata in cuppa di Francia (in Auch). Nanzu, deci ghjorni dopu, d’andà rende una visita à Metz, capu di a classifica. Per un’altra sfida ?
