U cambiamentu d’addestradore ùn hà micca purtatu, per avà, i resultati aspettati. Vennari, è ancu s’è u dispusitivu prisentatu di fronte à Béziers era più ambiziosu, issa nova scunfitta, a terza di fila in casa, face male, una settimana nanzu d’andà in Timizolu…
« U male serà, forse più prufondu ch’è noi a pinsavamu… » In trè parolle, Christophe Ettori, u direttore spurtivu di u Gazelec, hà fattu u riassuntu di a situazione di i rossi è turchini, vennari scorsu, dopu à una terza scunfitta di fila in Mezavia (Nancy, Orléans è Béziers). Una marca stretta (0-1), un’intrata ind’ a partita micca troppu male (un primu quartu d’ora interessante…), eppo, un contru ghjucatu à a lestra, ligne troppu allargate è una prima realisazione chì face sdrughje, in quattru è trè sette, u cullettivu aiaccinu. D’altronde, u gruppu ùn si ne rimetterà mai fora di qualchì occasione in principiu di secondu tempu.
Oghje, a situazione di u GFCA, diciassettesimu di a classifica (dui punti d’avanza nantu à Auxerre), hè di più in più periculosa. Masimu chè i prussimi avversarii sò…l’ACA, Troyes, Metz, Niort… »Sapiamu, spiega Hervé Della Maggiore, ch’ùn si pudia micca scambià tuttu d’un colpu. U gruppu hà persu in cunfidenza. Avemu da cuntinuà à travaglià ma, frà tempu, ci vole à piglià punti. »
U fattu hè chè u GFCA hà pigliatu un solu puntu nantu à diciottu dapoi e sei partite scorse. Vennari, dopu à u macciu, i ghjucadori anu parlatu cù i sustenitori. Ma ùn si tratta, da u cantu di i dirigenti, di crisa. « Ci vole à vultà à i fundamenti di u GFCA, ch’ùn semu più in leia cù u nostru ADN, aghjusta u direttore spurtivu. U Gaz t’hà, avà, menu d’una settimana per appruntà u so spiazzamentu in Timizolu. Nanzu una seria abbastanza difficiule. Ma, pocu impreme l’avversariu, ci vole, oghje, à reagisce. È manca, forse, pocu, per ripiglià a strada…
