Un pocu più d’un mese dopu à a demissione improvvisa di Frédéric Antonetti è in piena crisa spurtiva, u SC Bastia hà annunziatu, stu marti u 9 di dicembre, a numinazione di Gilles Cioni in qualità di cullaburatore spurtivu di u club bastiacciu. Una tappa nova per l’anticu capitanu di a casa turchina.
Hè un postu chì parechji dicianu dighjà ch’ellu li era destinatu ! Cum’è i so antichi cumpagni Jean-Louis Leca, François Modesto, Florent Ghisolfi o torna Grégory Lorenzi, nanzu à ellu, hè avà u turnu di Gilles Cioni di piglià in manu a pulitica spurtiva d’un club prufessiunale ! È micca n’importa quale ! Perchè, à u cuntrariu di i so amichi, hè in casa soia, in u so club di sempre, chì l’anticu difensore anderà à esercità !
Stu marti 9 di dicembre, u SC Bastia hà dunque annunziatu, per mezu d’un cumunicatu, a numinazione di Gilles Cioni à u postu novu di cullaburatore spurtivu. Un pocu più d’un mese dopu à a surpresa di a partenza d’Antonetti, Claude Ferrandi hà decisu di ùn lascià stu postu viotu. Logicu, mi dicerete, quand’omu cunnosce a situazione attuale di a squadra turchina. È altrettantu logicu quand’omu cunnosce u parcorsu è l’attaccamentu di Cioni à u Sporting.
Cù i so 230 partite ghjocate sottu à a maglia turchina, l’anticu capitanu hà fattu a so furmazione sana sana in u SCB. Hà cunnisciutu tuttu in questu club ! U peghju cum’è u megliu ! Moltu implicatu in a vita amministrativa di u Sporting dapoi a fine di a so carriera, Cioni hè statu, à turnu à turnu, ambasciatore di u club, stadium manager è membru di a cellula di reclutamentu. Diplumatu di u CDES di Limoges, « metterà avà a so sperienza, a so cunniscenza prufonda di u club è a so maestria di u football prufessiunale à u serviziu di a strategia spurtiva bastiacca. Averà in particulare per missione d’assicurà a coerenza è a fluidità di u prughjettu spurtivu trà e diverse cumpunente di u club », hà indettatu u SC Bastia in u so cumunicatu.
Per u presidente Ferrandi, « dapoi a fine di a so carriera, u rollu di Gilles Cioni in u club hà evolutu. Dapoi qualchì settimana, raprisenta per mè un sustegnu preziosu è essenziale per a bona messa in opera di e decisioni prese da a Direzzione in u duminiu spurtivu. Occuperà una funzione di culligamentu trà a squadra prufessiunale, e squadre di u centru di furmazione è u serviziu di reclutamentu ».
Una bella prumuzione è una sfida maiò per stu zitellu puru di a casa turchina, chì a so prima missione serà di rinfurzà in modu cunsiderèvule a prima squadra in i prossimi ghjorni per sperà di riesce una vera operazione salvezza in stu campiunatu di Ligue 2.
