Prestazioni, impegnu è eccellenza spurtiva eranu à l’onore stu 18 di ghjennaghju durante a ceremonia di i Trofei di i Sporti 2025 urganizata da l’UJSF Corsica. I ghjurnalisti spurtivi di l’isula anu in particulare attribuitu u Super Trofeu à u GFCA Volley, simbulu d’una staghjoni curunata da un titulu è da un ritornu in l’elite.
Cum’è ogni annu dapoi 12 anni, a sezzione Corsica di l’UJSF (Unione di i ghjurnalisti di sport in Francia), in partenariatu cù u Crédit Mutuel di Corsica, ricumpensa i spurtivi isulani per e so prestazioni.
À l’issue d’una scelta è d’un votu à fine d’annata, ghjurnalisti è spurtivi si sò ritruvati stu 18 di ghjennaghju nant’à u Pascal Lota di a Corsica Ferries : l’uni per attribuisce, l’altri per riceve i premii decernuti in cinque categurie : Super Trofeu, omagii, speranza, urganizazione è prestazione.
Per Jean Pruneta, presidente di a sezzione corsa di l’UJSF, sti trofei ricumpensanu i risultati, ma permettenu dinù è soprattuttu « di mette in valore tituli è discipline ch’omu ùn hà micca l’abitudine di vede ».
U Super Trofeu hè statu attribuitu à u GFCA Volley per a seconda volta, dopu à u titulu di campione di Ligue B in 2025, sinonimu di ritornu in l’elite di a disciplina in Ligue A. Per u so addestratore, Fred Ferrandez : « stu trofeu ricumpensa tutte e persone di u club ».
Lauriata d’un premiu per u so titulu di campiunessa di Francia 13-14 anni, a tennista Lola Tremellat, fiera di u so premiu, hà ramintatu chì « u tennis hè un sport difficiule è ch’ellu ci vole à dà tuttu senza risparmiu », nanzu chì u presidente di a Liga Corsa, Philippe Medori, ùn saluti « un puru pruduttu d’una liga chì sviluppa u livellu altu ».
Nant’à a scena, e spurtive è i spurtivi chì si sò succeduti anu salutatu risultati naziunali è internaziunali, mentre chì a Corsica ùn dispone micca sempre di e più bone infrastrutture naziunali, nè di e stesse facilità d’addestramentu.
Per e so prestazioni, i ghjurnalisti isulani anu ricumpensatu i spurtivi è e spurtive seguenti :
-
Pauline Lacroix (Club 2B Natation) : doppia medalista d’oru nant’à 100 è 200 m dossu à i campiunati di Francia ghjovani, medalista d’argentu à a Cuppa di u Mondu ghjovani cù a squadra di Francia
-
Alex Martins : campione di Francia di moto, categuria supermotard
-
Ezio Bastianelli (Wingfoil) : campione di Francia è vice-campione di u mondu junior U16
-
Thomas Biancardini – Romain Gentili (foot-volley) : campioni di Francia
-
Lola Tremellat (tennis – TC Costa Verde) : campiunessa di Francia in doppiu categuria 13-14 anni, primu titulu in simplice nant’à u circuitu ITF junior è a più ghjovana campiunessa di Corsica senior
-
Matisse Gellis (Fiumorbu Kick Boxing) : triplu campione di Francia Kick, K1 è Full, medalista d’argentu à a Cuppa di u Mondu, membru di a squadra di Francia dapoi u 2024
-
Gail Benedetti (80 anni, Tennis Club di Miomo) : campiunessa di Francia individuale è vice-campiunesa di u mondu in doppiu in a so categuria
U Trofeu Speranza hà ricumpensatu u ghjovanu pilotu di karting di 11 anni, Marc-Andria Quessada, membru di l’ASA Corsica, per u so titulu di campione d’Italia in a categuria Rotax Mini.
U JMP Racing hè statu ricumpensatu cù u premiu Urganizazione per l’urganizazione di i so rally moto.
Infine, Charlotte Marchini, decana di i cumissarii di rally in Corsica (85 anni), dinù ricumpensata da a FFSA, hè partita cù u Trofeu Omagiu per l’inseme di a so carriera.
