Duminatore contr’à u capilista troyanu, u Sporting Club di Bastia s’hè dovutu cuntentà d’un pareghju frustrante (0-0) stu vennari sera in Furiani. Solidi in difesa ma sempre in difficultà in efficacità offensiva, i Bastiais incatenanu un terzu 0-0 di fila è fermanu ultimi in classifica à dece ghjurnate da a fine.
Nova frustrazione per u Sporting Club di Bastia dopu u 0-0 cuncessu stu vennari in Furiani contr’à u capilista Troyes. Frustrante per parechji mutivi, in una partita cuntrullata da i Bastiais da u principiu à a fine contr’à una grande squadra chì hà avutu pocu occasione per mette in difficultà i Turchini.
Stu novu 0-0, u terzu di fila per i Bastiais, mostra di sicuru una sulidità difensiva ben stallata, ma sempre l’impussibilità di marcà malgradu l’occasioni numerose durante l’ultime partite : « Sta partita ferma una suddisfazione, fora di l’efficacità offensiva » spiegherà Reginald Ray, l’allenatore bastiacciu, in cunferenza di stampa dopu partita.
In generale suddisfattu di a prestazione di a so squadra contr’à Troyes, l’allenatore bastiacciu a ricunnosce : « Avemu fattu tuttu per vince, ci hè mancatu solu di marcà. »
Avà, l’allenatore a sà : à dece ghjurnate da a fine, i so attaccanti devenu truvà a via di a reta per ritruvà a salvezza è vede cumu e duie nove recrute, Joachim Eickmayer è Mehdi Merghem, puderanu purtà quellu picculu più chì manca à a finezza. S’è in a custruzzione è l’impegnu i Bastiais mostranu un altru visu dapoi dui mesi, a situazione in classifica ferma listessa : « Mustremu chì ùn avemu micca una faccia d’ultimi, ma a simu » dicerà Reginald Ray.
L’allenatore bastiacciu hà dinò criticatu l’arbitrage : « Diventa insupportevule. A subimu, è cumencia à fà assai. Falli chì meritavanu cartoni rossi. » Sin’à a fine di a stagione, i Bastiais ùn puderanu cuntà chè nant’à elli stessi.
In quantu à a classifica, si sà chì cù i « sì » si pò rifà u mondu. U Sporting averia pussutu spirà megliu, ma cù solu 3 punti presi nant’à l’ultime trè partite, i Bastiais fermanu ultimi : 18esimi cù 17 punti, à un puntu da Laval è à 5 da Amiens, chì hè in pusizione di spareghju. A situazione ùn hè ancu dispirata, ma u tempu corre.
Prussima tappa : un spiazzamentu stu vennari in Dunkerque è a ricezione, à a fine di u mese, d’Annecy : « Ci vulerà à ghjucà e partite chì fermanu cusì. Affruntemu l’avversarii, ch’elli sianu primi o ultimi, cù e listesse intenzioni » cuncluderà Reginald Ray.
