Quattordeci zitelli, frà tutti quelli chì cumponenu a struttura regiunale dedicata à l’atleti di nivellu altu anu ripigliatu u caminu di i tatamì dapoi l’ondeci di lugliu. Aspettendu di ripiglià i so quartieri à u CSJC, ghjè à u ginnasu San Paulu, ch’anu fattu i so primi passi dapoi guasgi quattru mesi…
Dapoi l’arrestu di tutti i sport di marzu scorsu, e discipline liate à i cumbatti sò state l’ultime à ripiglià. I prufessiunali di l’arti marziali, elli, avianu avutu, dopu à a fine di l’urgenza sanitaria, u vinti di ghjugnu, a pussibilità di ripiglià, à pocu à pocu, a so attività. masimu chè e cumpetizione anu da ricummincià. Ma l’atleti di u “Pôle Espoir” di Corsica, elli, sò stati ubligati d’aspettà…luni scorsu. Quì, quattordeci ghjovani di a struttura dedicata à u nivellu altu -l’altri anu da vultà à pocu à pocu- avianu appuntamentu qualchì ghjornu à u ginnasu San Paulu in Aiacciu. Una ripresa cù, quantunque, misure sanitarie da mantene. “Fisicamente, spiega Yves Camuzet, respunsevule di a struttura, i zitelli eranu bè ch’ognunu hà travagliatu durante l’arrestu. Mancanu quantunque di tecnica. Ci hà da vulè à travaglià in stu sensu quì, andà pianu per fà casu à e ferite è ripiglià, à pocu à pocu un ritimu nurmale…”
Da quì à qualchì ghjornu, l’atleti vulteranu à u CSJC. Frà i quattordeci, quattru, cuncernati per i campiunati di Francia, pudarianu, s’è tuttu và bè, participà, di settembre, à l’Auropeana cuppa…
