Malgratu una staghjone unurevule è a novesima piazza mundiale à a Ranking List, a vice campione di u mondu 2023 , certu ferita à a spalla di settembre scorsu, ùn hè micca stata ritenuta da a FFJ per i GU di Parrighji. Una dillusia tamanta per l’atleta calvese.…
Ghjè un sonniu chì si sfonda! Quellu d’una ghjovana atleta chè u percorsu pudia lascià sperà di chjappà si una participazione à i GU di Parrighji, l’estate 2023. Di fattu, Julia Tolofua, anziana membre di i Pôle Espoir di Corsica, ùn hà micca pussutu ritene e so lacrime à l’annucia di a selezzione francese, issa settimana, da i respunsevuli di a FFJ. Quelli, li anu preferitu, in a categuria di i più di 78 chilò, a so rivale, Romane Dicko (un atletu solu à categuria…). « Aghju amparatu a gattiva nutizia da ella, spiega l’atleta calvese. nimu, frà i membri di a Federazione, n’hà avutu a currezzione di chjamà mi. Hè una dillusia tamanta. Quattru annu di travagliu per issu resultatu quì! » Ferita à a spalla di settembre scorsu, Julia Tolofua, di l’età di vintisei anni, hè stata uperata cù e cunsequenze di scartà si qualchì tempu da i tatamì. Ma, à dilla franca, u so statutu di vice campione di u mondu, in Doha, di maghju scorsa, è d’una manera generale u so percorsu dapoi qualchì tempu, li permettia di ghjucà a cuncurrenza cù Romane Dicko. « Masimu chè i respunsevuli di a Federazione avianu dettu d’aspettà a ghjustra di Parrighji, di ferraghju prussimu per piglià a so decisione, aghjusta l’atleta, aspettu sempre a chjama di Stéphane Nomis, presidente di a FFJ. » Quandu ci hè statu l’annuncia di a selezzione, a settimana scorsa, in Tignes, induve ci eranu « E Stelle di u Sport », hè Romane Dicko, campione di u mondu 2022 è campione d’Auropa paer a quarta volta, di nuvembre scorsu, chì hè stata ritenuta. « Ci anu fattu crede, d’aostu, chè a selezzione si feria à l’occasione di a ghjustra di Parrighji. Per mè, issa decisione hè un sonniu chì si sfonda! » A piazza di numeru una mundiale di Romane Dicko, pò, hè vera, ghjustificà issa decisione. « Eppuru, aspettavamu, tutte e duie, a ghjustra di ferraghju per vince a nostra piazza. È per contu meiu, quella chì vincia devia andà à i GO. Chì femu s’eu vinciu di ferraghju??? Ùn la saperemu mai! » L’occasione, in tutti casi, per l’atleta isulana d’esse mutivata à issu mumentu quì.
