Battuta eri sera à u Rossini da Nizza (3-5), dopu à un macciu assai strettu sin’à a fine, a squadra corsa ùn participerà micca à l’ultima fasa di u Judo Pro League, u sei di ghjennaghju in Parrighji…
Compie dopu à un percorsu tamantu, à qualchì puntu d’una meza finale ch’elli anu tuccatu un mumentu, hè una dillusia maiò per atleti ch’anu travagliatu mesi è mesi. A storia hà di ritene chè per a so seconda participazione à u Judo Pro League, a squadra corsa s’arresta à u nivellu di i quarti di finale. Creata in u 2022 da a Federazione Francese, issa cumpetizione hà per scopu di prufessiunalizà a disciplina è à tempu, di creà una dinamica chì và in issu sensu quì. Una manifestazione dedicata à squadre spertute in tutta a Francia, squadra d’una cità o un rughjone. Ogni volta, ci sò dece cunfruntazione trà omi è trà donne.
Questu annu, eranu tredeci à participà à partesi d’u mese di settembre. Dopu avè francatu cù successu a prima fasa, a squadra corsa avia battutu à Marseglia è ottenutu u so bigliettu per i quarti di finale eri di fronte à Nizza à u Rossini. Una partita assai stretta sin’à a fine chì s’hè ghjucata nantu à detagli. 0-1…3-3, un tocca à toccu sin’à u macciu trà Léa Machut è Valentine Marchand. A zitella di a squadra corsa avia e cose in manu ma hè stata surpresa in fine di partita (0-1). Di fattu, tuttu s’hè ghjucatu trà Bilel Zouani è Guerman Andreev, campione di Francia di a so categuria. Un Nizzardu hà pigliatu a suprana nantu à so avversariu è hà vintu di manera logica. Una scunfitta chì face male. « Avemu fattu un bellu percorsu, spiega Yves Camuzet, respunsevule di a squadra, mancavanu quantunque atleti impurtante cum’è u nostru capitanu ch’averia permessu di cuntà un puntu in più è d’ùn ghjucà forse, a qualificazione nantu à l’ultimu macciu. Ma, avemu amparatu è avemu da riparte più forti l’annu prussimu… »
A squadra corsa ùn participerà micca à u « Final Four », u sei di ghjennaghju in Parrighji. Li tocca, avà, à mubilizà si per l’annu chì vene è francà issu passu quì.
Resultati :
Corsica Judo-Judo Nice 3-5
-52 chilò : Lalou Lebrun-Léa Metrot 0-1
-65 chilò : Karim Saidoun-Guillaume Hureau 0-0
–57 chilò : Mathilde Agier Shashanah Chovot 2-0
-75 chilò : Alexandre Tama – Giorgi Chikhelidze 0-1
–63 chilò : Charlotte Von Leupoldt – Lena Katia Siouane 2-1
-85 chilò : Hamza Kabdani – Irakli Beroshvili 0-1
-70 chilò : Alexiane Coqueret – Sandra Teophila Darbes Takam 1-0
-95 chilò : Karel Foubert – Téo Lherbier 0-0
+70 chilò : Léa Machut -Valentine Marchand 0-1
+95 chilò : Bilel Zouani – Guerman Andreev 0-1
