U pilota isulanu hè entrutu cum’ellu ci vulia à u rallì di u Qatar, prima corsa chì conta per u campiunatu di u Mediu Oriente. À u vulante di a so Skoda Fabia, u Purtivechjacciu s’hè chjappu a corsa davanti à Nasser Al-Attiyat nantu à e so terre…
Malgratu e so qualità, mustrate d’altronde in u passatu nantu à parechje corse, Pierre-Louis Loubet, u pilota isulanu, ùn era aspettatu à a Qatar, induve ci era a prima corsa di u campiunatu di u Mediu Oriente. È què per parechje ragione: una nova cumpetitizione (WRC2), una nova vittura (Skoda Fabia) è un novu copilota (Loris Pascaud). U tuttu à mezu à piloti rinumati cum’è Nasser Al-Attiyat (Polo), quadruplice vincidore di a prova ma dinò u Nurvegianu Mads Ostberg (Polo).
Eppuru, u pilota corsu hà trovu subbitu e so marca in issa corsa quì, postu ch’ellu avia riesciutu à finisce a prima speciale à a terza piazza cù u secondu tempu à solu 8/10i di u Nurvegianu. Di fattu, ci era dodeci prove speciale in issa cumpetizione è Loubet hà mustratu tutte e so qualità postu ch’ellu hè cullatu prestu à a prima piazza di a classifica davanti à Al-Attiyat ch’avia pigliatu una mez’ora di penalità. Un’avanza chè u Purtivechjacciu hà pussutu gestisce malgratu u ritornu d’Otsberg. Loubet hà mantenutu a so avanza di vintidui seconde per, in fine, compie cù quattru seconde d’avanza. À l’arrivu, una bella vittoria chì, forse, ne puderia chjamà d’altre…U sultanatu d’Omanu, a Giordania, u Libanu è Cipru seranu e prussime tape per u pilota isulanu…
