U GFC Aiacciu hà riesciutu perfettamente i so principii in u so giru di Naziunale 3 andendu à vince (0-1) in Amiens à l’occasione di a prima ghjurnata di campiunatu. Nanzu di riceve a riserva di Reims stu sabbatu (17 ore) à Mezzavia, Louis Poggi, u presidente, evoca a situazione è l’ambizioni di u club aiaccinu.
Per forza, hè difficiule d’imaginà megliu principiu dopu à sta vittoria in Amiens…
« Esattamente, ci face un piacè tamantu, sò principii eccellenti. Ma, ùn ci vole mai à scurdà d’induve no venimu. Semu sopratuttu cuntenti per i nostri sustenitori d’avè rimessu stu club à un livellu naziunale. Dopu à dui anni in Regiunale, ùn si pudia micca sognà megliu cà una vittoria per lanciacci in sta stagione difficiule chì ci aspetta »
Chì raprisenta per voi stu ritornu à un livellu naziunale ?
« Rappresenta un affare tamantu per un club cum’è u nostru, chì hà una longa storia in u football francese. Pensu sopratuttu à i nostri sustenitori è à sta grande famiglia di u Gazélec, chì hà cunnisciutu tante suffrenze in sti ultimi anni. Ci era ancu a paura ch’ellu sparissi stu club. Oghje si torna à parlà di u GFCA in modu pusitivu è quessa hè digià una vittoria maiò. Ùn ci vole micca scurdà i nostri giovani chì ghjucanu digià à livellu naziunale dapoi parechji anni è a nostra scola di football chì cresce senza piantà. U club cuntinueghja à travaglià in serenità »
Stu ritornu in u giru naziunale porta cun ellu difficultà particulare ?
« Semu una squadra di dirigenti nova è ùn avemu mai cunnisciutu u club à stu livellu quì cù tutte e difficultà amministrative chì porta cun ellu. Hè una sperienza tutta nova per mè cum’è presidente cù tutti i giovani dirigenti chì m’accompagnanu. S’impara tutti i ghjorni ; i regulamenti cambianu tutti i ghjorni allora pruvemu d’adattacci u megliu pussibule è crescimu à listessu tempu chì u club. Semu stati lanciati in u gran bagnu à stu postu quì è per forza ùn hè micca simplice ma pensu ch’omu s’arrangia micca male (ride). Ci stringhemu i coti inseme in ogni modu »
Cumu tene a testa fridda è ùn lasciassi purtà dopu à sta prima vittoria per u ritornu in N3 ?
« S’è no ripensemu à ciò chì hè accadutu dui anni fà, basta per fà calà torna à a realità à tutti. U club hà cunnisciutu assai disgrazia. Ma oghje, ùn ci vole micca infiammassi. Ci vole à servacci di ste sperienze passate. Cum’è Presidente, serà ancu u mo rollu di ramintà tuttu ciò chì u club hà vissutu per avanzà ma cù serenità »
Chì sò l’ubbiettivi ch’avete fissatu à u vostru allenatore per sta stagione ?
« L’idea hè di fà a megliu stagione pussibule in ottinendu u mantenimentu u più prestu pussibule. Quandu si ottene un mantenimentu faciule, dopu si pò vede ciò ch’omu pò veramenti sperà in stu campiunatu. Quessa ùn impedisce micca d’avè ambizione ma tuttu què hè frenatu da i traumi ch’avemu cunnisciutu in sti ultimi anni. L’ubbiettivu à cortu andà hè di stabilizà u club à stu livellu. Ma, ùn ci hè micca solu a squadra prima, hè dinù u nostru scopu cù l’U19 è l’U17 naziunali. Più in generale, avemu un ochju nant’à tutte e nostre squadre impegnate in campiunatu regiunale è a nostra scola di football. L’aghju digià dettu, elli sò l’avvene di u Gazélec »
Stu ritornu in u giru naziunale à Mezzavia sabbatu averà per forza un gustu particulare…
« Hè un gran sollievu per i sustenitori d’esse di ritornu à stu livellu. Ma, ùn ci vole à piattà si daretu à e parolle, hè u minimu per un club cum’è u GFCA. Si sente digià assai entusiasmu cù una campagna d’abunamenti assai interessante (vicinu à 700 abunati). Hè a prima volta ch’e saraghju in N3 da u latu di i dirigenti, hè dinù una cosa nova per mè. Avemu brama, ma avemu dinù un pocu d’apprensione, postu chì l’organizazione hè differente è cunsiderèvule in N3. Ma, saremu pronti u ghjornu J ! Dopu, sò sicuru chì i ghjucadori si daranu à fondu è chì i sustenitori saranu numerosi per susteneci è purtacci versu a vittoria, tutti l’avemu à core »
