In attesa di a decisione definitiva di a cumissione di disciplina dopu à l’incidenti contr’à Boulogne, vennari u 13 di marzu, u club riflette à a so difesa… è à un stadiu per accoglie lu vennari chì vene dopu à a sanzione di sta stessa cumissione.
Claude Ferrandi, u presidente di u Sporting Club di Bastia, è dinù Jean-Louis Constant, direttore di a securità di u Sporting, sò stati intesi sta settimana da l’istruttore di u cartulare SCB-Boulogne, à a cumissione di disciplina di a LFP.
I servizii prefetturali è a Sicurezza publica devenu esse intesi anch’elli da quì à vennari. Per ramintà, dopu à stu scontru di vennari u 13 di marzu, è a scunfitta 1-0 di u Sporting, una centinaia di sustenidori era entrata nant’à u parking di u stadiu Armand-Cesari, tribuna nord, è s’era ammassata davanti à a porta di u vestitoghju bastiacciu è quella di i burelli di u club. A situazione era firmata tesa ma senza scontri, nè interventu pulizzeru, sin’à mezanotte.
Al di là di l’istruzzione di u cartulare è in attesa di u PV definitivu u 8 d’aprile, u club riflette à una saisina di u Cumitatu Naziunale Olimpicu è Sportivu Francesu, ghjudicendu digià a misura cunservatoria d’un ghjocu à porte chjose è sopratuttu di una partita nant’à terrenu neutru sproporziunata.
I dirigenti di u Sporting volenu soprattuttu mette in valore chì, à u cuntrariu di ciò chì lasciavanu pensà certi tweets a sera di u scontru, nisun sustenidore hè entratu ind’è i burelli di u stadiu. Ma hè ciò chì hè apparutu in u cumunicatu di a cumissione di disciplina è chì hà, in parte, ghjustificatu a prima misura. A decisione di fà appellu à u CNOSF puderia esse presa, o micca, in e 24 ore à vene.
