A spurtiva insulana, chì participava, a settimana scorsa à in Campiunati di u mondu in Baccù hà compiu a cumpetizione c’una bella medaglia d’argente cù a squadra di Francia…
S’aspettava monda di Priscilla Gneto (-57 chilò) à l’occasione di i campiunati di u mondu chì si tenianu in Baccù (Aiserbadgianu) durante a settimana scorsa. Dopu à uni pochi di prublemi fisichi, l’atleta isulana ripigliva è t’ avia, torna una volta, ambizione logiche in sta cumpetizione.
Ma pudia esse dilusa à u nivellu individuale c’una scunfitta in ottesime di finale (terzu giru) di front’à Nora Djakova (Cossovò) dopu à un ippon in fine di partita. A ghjustra s’hè piantata quì per quella chì fù campione dAurupa 2017. Ci saria vulsutu una piazza in quarti di finali per sperà esse qualificata ancu c’una disfatta.
Peccatu ! Ma Priscilla riesce quantunque à ottene a medaglia d’argente cullettiva cù a squadra di Francia, battuta in finale, da u Giapponu dopu à avè cacciatu a Russia. E « Turchine » ùn anu pussutu vince c’una sola partita. Per contu soiu, Priscilla Gneto hà persu di fronte à Tsukasa Yoshida, campione di u mondu in individuale.
Prussimi scontri per l’isulana, in Abù Dahbì da u 27 à u 29 d’ottobre…
