SC Bastia
Gazélec Aiacciu
AC Aiacciu
CA Bastia
Foot Amateur
Squadra Corsa
GFCA Volley
Abbastanza cunnsciutu in u mondu culturale, Ghjuvan Filippu Martini, 31 anni, t’hà un’altra passione chè u cantu : e corse di vitture. È masimu, u famosu Giru di Corsica, u « storicu » o u « mudernu ». Una passione chì l’hà da permette, cù Yohan Raffaelli accantu à ellu, di participà, à u vulente d’una 208 R2, à u so secondu Giru. Cù, sta volta, a voglia di ghjunghje à a fine…
Hè difficiule, quand è vo t’avete un cumpare chì si chjama Ghjuvan Paulu Chiaroni, d’ùn piglià, un ghjornu o l’altru, una vittura di corsa. Masimu chè i rallì facenu parte di quelli attività spurtive chì passiuneghjanu i Corsi dapoi anni è anni.
« U Giru di Corsica, hè sempre statu un sonniu… »
Issu percorsu hè principiatu da zitellu per Ghjuvan Filippu. « Si pò dì ch’aghju sempre bagnatu nentru, à mezu à u me babbu, chì facia tante corse, è, di sicuru, u me cumpare. Ma, à dilla franca, participà à u Giru di Corsica hè sempre statu un sonniu per mè. »
Un sonniu chì si realizeghja dopu à uni pochi d’anni. « Mi piacia monda a vitezza ma ci hè vulsutu à aspettà nanzu di piglià una vittura. »
Omancu diciottu anni, l’età di u permessu !
« U Giru di Corsica hè qualcosa chì, oghje, hè culturalmente sculpitu in e memorie isulane »
In u 2007, Ghjuvan Filippu Martini hè accantu à u so babbu, ind’ una Opel Kadett, per u so primu Giru di Corsica. Storicu quessu quì. Quattru anni dopu, serà à mezu à i piloti famosi per una prima sperienza, tandu in u famosu Giru. « Aghju pichjatu in Zerubia è abandunnatu. Peccatu per una prima. »
È dopu à qualchì corsa in Corsica (vincerà quantunque u rallì di u Paese Aiaccinu in u 2016) è in altrò (Var), s’hè scrittu à l’edizione di u famosu rallì. « L’anziani piloti eranu mudelli, ma pensu dinò à u me babbu è u me cumpare. Pensu chè u Giru di Corsica hè qualcosa chì, oghje, hè culturalmente sculpitu in e memorie isulane. In più, per noi altri Corsi, esse à mezu à piloti famosi hè qualcosa di strasordinariu. »
Dopu à un cuncertu, datu a settimana scorsa à a CCAS, « per ringrazià à tutti quelli chì ci anu aiutatu è bulicà sport è cantu chì sò liati », piglierà u vulente di una 208 R2 cù, Yohan Raffaelli accantu à ellu per participà à u so secondu Giru di Corsica. Cù sta volta, u scopu di ghjunghje in Calvi…