GFCA: Un’alba nova!

Malgratu a relegazione in N2, a squadra aiaccina vole riparte nantu à un prughjettu novu: scambiamentu di statutu ghjunta d’azziunarii è direzzione spurtiva data à David Ducourtioux, un anzianu di a casa « Rossu è turchina ». Scopu, ritruvà, dopu à dui anni difficiuli, l’anima antica di a squadra per, à più o menu longu andà, vultà in u mondu prufessiunale.

U GFCA hà pacatu monda dapoi a so falata da a Lega una. Ùn si conta più l’addestradori (cinque), i ghjucadori (più di 130 in cinque staghjone) per falà, à pocu à pocu, è vultà in n2 (anzianu CFA) induve ellu era pocu tempu fà. Ma sta volta, l’affare risicheghja di scambià. A ghjunta d’un presidente novu à u principiu di l’annu (Mathieu Messina) entre ind’un’altra fasa per a squadra rossa è turchina chì vole rinvivisce a so fiara. Tandu, l’urganisazione hà da cambià. Cù u presidente, u statutu passa da l’EURSL à una SASP incù dui azziunarii, Anthony Perrino è Pierre Anchetti. In trè, i novi dirigenti volenu purtà fondi per fà cresce u GFCA. Centru  di furmazione, terreni d’addestramentu…Una dinamica chì piace assai à i sustenidori ch’ùn ghjunghjianu più à u stadiu. Adunisce tuttu u populu « Rossu è Turchinu », eccu, dinò, unu di i scopi di i dirigenti. È per ciò chì tocca à l’aspettu spurtivu, ghjè un anzianu di a casa chèi ne serà incaricatu: David Ducourtioux (chì hà purtatu a maglietta aiaccina da u 2014 à u 2017) assestatu da Jérôme Lemoigne, unu di i so cumpagni di a Lega Una. In dui, anu da avè per scopu, di fà vultà u mondu in Mezavia di ritruvà l’estru anticu (sparitu, ci vole à dilla, issi pochi anni), è, à pocu à pocu vultà in u mondu prufessiunale. A fasa di preparazione (ottu settimane) principierà di lugliu, oer una ripresa di u campiunatu privista versu a fine d’aostu…