Dumè Guidi : a fiara rossa è turchina

0

guidi-pfc-017Sbarcatu in Aiacciu di ghjugnu scorsu, senza esse sicuru di ghjucà, issu difensore di vinti dui anni hà riesciutu, in pocu tempu, à fà a so strada è s’impone da ghjucadore maiò di a squadra rossa è turchina…

Quand’ellu sbarca in Aiacciu, di ghjugnu scorsu, Dumè Guidi, zifra, di sicuru, u so primu cuntrattu prufessiunale. Ma ùn li dà micca l’assicuranza di ghjucà in Lega 2 chì e piazze sò scarse. Masimu ch’ellu vene di passà una settimana cù l’ACA senza alcuna risposta.

« Aghju ricivutu una chjama di Cristofanu Ettori, spiega u ghjucadore, per mè ci era sempre a pussibilità di zifrà da prufessiunale. È cum’e vuliu piglià una rivincita nantu à mè stessu… »

Da Bastia à Aiacciu

Di fattu, u percorsu di Dumè Guidi, ùn hè statu cusì faciule. Una furmazione in Bunifaziu è Portivechju nanzu di entre à u centru di furmazione di u Sporting à tredeci anni. « Era, per mè, un segnu maiò è dinò un sognu zitellinu. Ma eru forse troppu ghjovanu per sperà megliu, ghjuntu à a fine. »

U difensore passa tutte e categurie, franca i passi da u nivellu regiunale à naziunale (menu di diciassette anni, menu di dicenove anni, squadra riserva) ma mancherà, di pocu, di zifrà u famosu cuntrattu. « Ricunnoscu, oghje, ch’ùn eru micca abbastanza seriu à l’epica, ùn aviu micca a vita d’un spurtivu chì vulia esse prufessiunale. A « sintenza » fù logica. »

Malgratu issu fattu, u difensore cerca à ghjucà à un nivellu più bassu. Sperendu sempre, accantu, in quellu sognu prufessiunale. Passa una staghjone in U Borgu (CFA2) è duie in Furiani (listessu nivellu) nanzu, in fine di cuntrattu, di fà una prova cù l’ACA, è di zifrà u cuntrattu monda aspettatu cù u…Gazelec. Tandu, u seriu hè u so cumpagnu di strada. « A sapiu dighjà in U Borgu è in Furiani chè s’e vuliu fà qualcosa in u ballò, ci vulia, nanzu à tutti, scambià a me manera d’esse. Hè ciò ch’aghju fattu. Quand’e sò ghjuntu à u GFCA, eru prontu ma, à dilla franca, ùn m’aspettava micca à esse subbitu titulariu. »

U famosu ACA-GFCA

U difensore principia di fronte à u PFC à l’apertura di u campiunatu prufittendu di e suspensione è e ferite di Perquis è Ba. È, ùn cappia mai più a so piazza. Megliu ! Riesce duie realisazione d’attaccante. A prima di fronte à u Red Star (2-1) à a fine di u tempu supplementariu. È a seconda in quella famosa partita di fronta à l’ACA…À l’usu Gerd Müller ! « Hè vera ch’ella era un’azzione d’attaccante. Fù, per mè, un ricordu maiò. Ma, aldilà, ciò chì era importante, funu i trè punti ch’è no stavamu nantu à una seria di sei macci senza vittoria. Issa vittoria, ci hà fattu un bè tamantu à u nivellu psicologicu è dinò, di a cunfidenza. »

Per a seguita, u difensore « rossu è turchinu » vole piglià i macci unu dopu à l’altru. « A squadra ripiglia fiatu, hè u più impurtante. Per contu meiu, cercu sempre à fà per u megliu per purtà a me petra. Aghju sempre avutu cunfidenza in issu gruppu quì. Ci sò ghjucadori di qualità. Pocu impreme u me percorsu parsunale. Spergu ch’avemu da compie a prima parte di a classifica franchendu i vinti o vintidui punti per sperà megliu in seconda parte. »

U GFCA tene quì, di sicuru, un ghjucadore chì rinvivisce a fiara antica rossa è turchina di quelli tempi andati. Una bona per tramandà…

 

Identità

Dumè Guidi

Natu u vintidui di ferraghju di u 1996

1,77 metru   settantacinque chilò

Percorsu : Bunifaziu, Portivechju (furmazione), SC Bastia (2010-2015, centru di furmazione, squadre « naziunale », riserva), Borgu (2015-2016, CFA 2, 2 macci), Furiani (2016-2018, CFA2, 15 macci, una realisazione), GFCA Aiacciu (dapoi u 2018, 14 macci, duie realisazione).

Postu : difensore

Numaru : 18

Primu macciu in Lega dui : 27 di lugliu di u 2018, GFCA-Paris FC (1-1)

Prima realisazione in Lega dui : u 29 d’aostu di u 2018, GFCA-Red Star (2-1)

Internaziunale (squadra corsa)guidi-pfc-017

Sparte

Dipusità unu cummentariu