Anne-Caroline Graffe in Aiacciu

Centu stazianti di u Mungunwha Corsica tae kwon do ani passatu una ghjurnata cù Anne-Caroline Graffe, vici-campioni ulimpica di a disciplina. Una bedda ghjurnata pà tutti, ziteddi è maiò, dumenica scorsa.

Dopu à a so medaglia di bronzu, in u 2012 in Londres, Anne-Caroline Graffe era ghjunta dighjà una volta in Aghjacciu pà gestiscia una ghjurnata di staziu. Setti anni dopu, hè vultata in a cità imperiali, sempri invitata da Nicolas Sanna, capifila di u Mungunwha Corsica Tae Kwon Do. À u prugramma, scaldamenti è esercizii pà i ziteddi (difesa, pedi, mani, incatinamenti) a matina, è un travaddu più dedicatu à i cumbatti cù i maiò u dopu meziornu. Fù l’occasioni, à tempu d’appruntà i campiunati di Corsica, chì s’ani da ghjucà issa dumenica à u CSJC. « Tutti i stazianti ani passatu una bedda ghjurnata, spiega Nicolas Sanna, à veda i surisi di a ghjenti è l’ambianza, pensu chì tuttu u mondu era cuntentu. Hè sempri una bona di pudè travaddà cù un atletu d’altu nivellu, ùn hè micca tuttu i ghjorni ch’a pudemi fà… »Imbasciadricia di Taitì per a disciplina, Anne-Caroline Graffe s’appronta, avali, pà a ghujstra di qualificazioni à i Ghjochi Olimpinchi d’aprile. Sperendu parta, d’aostu, in Tocchiò…