Una prima vittoria per u RCA

Si ghjucava, issu sabbatu, a prima ghjurnata di u campiunatu di Prumuzione d’onore. Nantu à u so terrenu di Vignetta, i ghjucadori di u presidente Ghjilormu Torre anu principiatu cù una bella vittoria di fronte à Antibes. Ci serà, di sicuru, da chì fà, issa stagione per i «  bianchicilesti ».

Rientrata vittoriosa sabbatu scorsu in Prumuzione d’Onore per a squadra aiaccina chì principiava a so stagione in casa soia di fronte à Antibes. Un risultatu abbastanza severu (21-7), qualchì azzione di qualità, una partita gestita bè, a maiò parte di i ghjucadori passati per a furmazione « Bianchicilesta ». È, nantu à u terrenu, una suprana pigliata subbitu di fronte à una squadra d’Antibes monda in difficultà. Duie marche trasfurmate è un bellu 14-0 in tempu di riposu.Un ritimu pocu calatu in secondu tempu è, di manera logica, una terza marca, dinò trasfurmata (21-0). Peccatu, a ligna aiaccina si lascerà trappassà guasgi à l’ultima seconda (21-7). Una bella vittoria, quantunque, chì permette à l’omi di Ghjilormu Torre di sulcà, subbitu, u so territoriu. Un macciu da cunfermà a dumenicata chì vene in Pierrefeucain.