Per a prima volta, u Tour di Corsica Storicu hè statu distintu in Londra u weekend scorsu, purtendu si u prestigiosu premiu di u migliore rally storicu 2025 à l’International Historic Motoring Awards. Una ricunniscenza chì mette in risaltu l’ascesa di u livellu di a prova è u so raghju internaziunale.
Sport automobilisimu – U TDCH primatu à l’International Historic Motoring Awards
U weekend scorsu, s’hè tenuta in Londra a cerimonia di rimessa di i trofei in u quadru di l’International Historic Motoring Awards. Un scontru di altissimu livellu chì offre una vetrina nant’à u mondu di u veiculu storicu in tutta a so larghezza : publicazioni, musei, avvenimenti sportivi di ogni stile è, di sicuru, i rally.
Per a prima volta, u Tour di Corsica Storicu figurava trà e prove nominate. L’edizione 2025 di u TDCH, chì s’hè svolta da u 4 à l’11 d’uttroviu, hà battutu i so propii record di participazione cù 400 equipaghji impegnati.
Dapoi parechje edizioni, u Tour di Corsica Storicu hà rilevatu a sfida di a prufessiunalizazione di a so urganizazione per prupone una prova sempre più ambiziosa, è chì oghje tocca un’audienza chì trapassa e fruntiere naziunali per ghjunghje à un livellu europeu è mundiale.
Cumbinendu tracciati innuvatori è di grande qualità, ripiglendu e speciali mitiche, paisaghji chì lascianu senza fiatu, è un plateau chì ogni annata ragruppa cunduttori di fama internaziunale, u TDCH s’hè impostu cum’è unu di i più grandi rallyi storichi di u mondu. Una notorietà salutata da e riviste specializate, ben al di là di a stampa francese.
Sta prugressione hà trovu a so giusta ricumpensa in Londra, induve u Tour di Corsica Storicu hà vintu u prestigiosu premiu di migliore rally storicu 2025, davanti à prove rinumate d’ogni parte di u globu. A delegazione di u TDCH, guidata da Marie-Ange Dini, capu di a squadra d’urganizazione, hà ricevutu u so trofeu cun una emozione evidenta è una grande fierezza.
