À trè ghjurnate di a fine di a stagione, u SCB hà ottenutu, di manera ufficiale dopu a so parità di fronte à u Gallia (0-0) u so bigliettu per a Naziunale 2, l’annu chì vene. Un titulu simbolicu à quattru ghjorni di a cummemurazione di u cinque di maghju…
Tuttu u mondu sapia chè u so percorsu dapoi u principiu d’issa stagione avia da permette à u Sporting d’ottene u so bigliettu per a Naziunale 2. Bastava à sapè quandu i Bastiaccia avianu da francà issu passu. L’affare hè statu ufficializatu issu mercuri dopu à un macciu in ritardu di fronte à u Gallia. Li bastava un puntu per esse assicurati di manera matemetica, un puntu pigliatu in Furiani di fronte à u Gallia (0-0). Saria forse statu megliu di piglià ne trè ma una parità chì li dà u titulu in Naziunale trè dui anni dopu à a so relegazione in u mondu amatore. Cù una squadra à l’accentu “nustrale” per a maiò parte di i ghjucadori, u Sporting hè statu prisente tuttu l’annu. Basta à fighjulà i sciffri per avè ne a cunferma. Cinquantadui realisazione, a difesa a più sicura di u campiunatu (nove realisazione incasciate), una sola scunfitta (in Aubagne) è trè parità in vinti macci, nimu ùn hè statu capace di tene issu ritimu. À quattru ghjorni di u tristu anniversariu di u drama di Furiani, ùn si tratta, sicura, di festighjà veramente issu titulu, una questione di rispettu ma u Sporting pò esse fieru d’avè riesciutu a so sfida. Nanzu di pensà à a prussima stagione, li ferma
quattru macci (trè è un di ritardu), l’occasione di finisce bè è sopratuttu di fà cresce appena i sciffri…
