A Federazione Francese di Football (FFF) hà publicatu u calendariu di a Liga 3 per a staghjoni 2026-2027. U Sporting Club di Bastia principierà u campiunatu u 7 d’aostu in casa, à porte chjose. I Turchini riceveranu u Le Puy-en-Velay FC.
A FFF hà svelatu u calendariu di a Liga 3 issu mercuri u 1u di lugliu. A terza divisione prufessiunale principierà u 7 d’aostu à 20 ore è 45 cù un multiplex di nove scontri.
Per ciò chì tocca à u Sporting Club di Bastia, riceverà u Le Puy-en-Velay FC per a so prima partita in Furiani, in un stadiu Armand-Cesari chì serà viotu per via di a sanzione inflitta dopu à l’incidenti accaduti durante l’ultimu scontru di Liga 2 contr’à Le Mans. Ci vulerà à aspettà u 5 di settembre, à l’occasione di a quinta ghjurnata, per vede torna i sustenidori in Furiani, cù a venuta di l’Amiens SC, anch’ellu anzianu residente di a Liga 2.
A fase d’andata finirà à a 17a ghjurnata, u 23 di ghjennaghju di u 2027. Per e 32a è 33a ghjurnate di a staghjoni 2026-2027, u Sporting riceverà in Furiani La Roche-sur-Yon è l’US Thionville Lusitanos, nanzu di chjode u campiunatu cù un spiazzamentu nant’à u campu di Le Puy-en-Velay FC.
E meze finale d’accessione in Liga 2 si ghjucheranu u marti 25 di maghju di u 2027, mentre chì a finale serà disputata u venneri chì seguita. In casu di qualificazione per u barrage, e duie partite si ghjucheranu u 1u è u 6 di ghjugnu di u 2027. A squadra di Liga 3 riceverà a partita d’andata in casa.
