U SC Bastia (17u) s’affronta stasera cù Bulogna, ultimu di a Lega 2, per pruvà à piglià a so prima vittoria. Diminuìti da parechje assenze, i Bastiani volenu lancià a so staghjone. Tavenot è Tomi insistenu : « ùn hè micca una partita di a paura ma una battaglia da vince »5. Fischetta di principiu à 19 ore.
U Sporting Club di Bastia (17u) si move stasera à Bulogna-sur-Mer, fanale rossu di a Lega 2, per pruvà à strappà a so prima vittoria di a staghjone. Sta partita in ritardu di a prima ghjurnata, prevista à l’iniziu contr’à l’ACA nanzu à a retrocessione di l’acèisti, oppone duie squadre in grande difficultà : Bastia hà pigliatu solu dui punti in quattru ghjurnate, mentre chì Bulogna ferma à zeru, dopu à quattru scunfitte.
Senza parechji titulari (Akueson, Parravicini, Janneh, Bohnert, Vincent), i Bastiani sanu ch’elli ùn averanu micca u compitu faciule di pettu à i Nurdisti determinati. « Ùn hè micca a partita di a paura », hà vulsutu ridimensionà l’allinatore Benoît Tavenot. « A partita di a paura seria à sei o sette ghjurnate da a fine. Quì ùn hè micca u casu. »
« Vulemu avanzà, vulemu fà un risultatu à Bulogna. »
Per u coach, a partita si prisenta prima di tuttu « cum’è una battaglia, fidu à u caratteru di u club avversu, Bulogna sprime assai determinazione, hè a cità è a regione chì u volenu cusì. Toca à noi di vince. »
U listessu discorsu vene da i ghjucatori, cum’è l’attaccante Félix Tomi, determinatu à lancià finalmente a staghjone di i Turchini : « Hè una partita impurtante, perchè vulemu trè punti, ùn l’avemu ancu avuti. Serà difficiule, ma avemu largamente l’argumenti per rivaleghjà è vince sta partita. »
