U Handball Aiacciu Gravona in Naziunale duie!

Trè anni solu dopu à a so nascita, a squadra di Philippe Tormen riesce à cullà in Naziunale Duie. Una perfurmanza maiò ufficializata a settimana scorsa dopu à un’un ultima vittoria di fronte à Bastia (45-14). Si pò, dighjà, appruntà l’avvene…

Natu di ghjugnu u 2016 da uni pochi d’amichi passiunati, u Handball Aiacciu Gravona, hà francatu, in trè stagione, un passu maiò. Trè esercizi per cullà à u pianu sopra, in Naziunale duie. L’affare hè stata ufficializata dopu à a vittoria di fronte à Bastia a settimana scorsu. Tandu, si pensa dighjà à l’avvene. « Avemu travagliatu, à tempu u spurtivu è l’amministrativu, spiega Philippe Tormen, preidente di a squadra, face chè oghje, semu prontu per francà issu passu. ». Cù una cintena di licenziati, una participazione ind’i sculari è l’ambizione di sviluppà si in a ruralità (rughjoni di a Gravona) è in Purtichju, a squadra face a so strada. « Avemu da piglià cinque o sei ghjucadore in guasgi tutti i posti è travavaglià à u mantenimentu è, à tempu à fà cresce a nostra struttura. » Prussimi appuntamenti per u HAG, e ghjustre dedicate à Jean-Pierre Pannequin è u tintu José de Nobili di ghjugnu. L’occasione d’addunisce a famiglia sana di a disciplina…