Dopu à una bella partita di ripresa, sabbatu in Le Teil (25-28), e femine di u HAC mantenenu a so piazza à u capu di a classifica. Di colpu, u spiazzamentu dumenica in Beauvallon, terzu di u campiunatu, pudaria esse impurtante per a seguita…
Quale hè chì pò, oghje, 
piantà a corsa di u HAC, capu di a classifica cù, hè vera, solu dui punti d’avanza nantu à HB Gardeen è Beauvallon (tutti i dui anu 23 punti)? Nimu la sà. È fermanu quantunque tredeci partite. Tandu, ùn ci vole micca pensà chè l’affare hè ind’u saccu Ma u cuntinutu di e femine, a voglia ch’elle mettenu è u travagliu di l’addestradore Stefanu Petreto, portanu i so frutti. Facenu sperà monda…D’altronde, a vittoria di sabbatu in Le Teil hè ghjunta à dà a cunferma di sti sintimi quì. U HAC cuntinueghja dunque à fà a so Strada cù una sola scunfitta (d’ottobre scorsu in Mazan). Ma a perdita, di dicembre, di José De Nobili, u so persunaghju maiò, hà purtatu un colpu maiò à tutti, dirigenti, ghjucadori, sustenidori….Ghjè, per avà, u so figliolu Stefanu, chì ripiglia a fiara omancu sin’à a fine di a stagione. Aspettendu, è per vultà nantu à l’aspettu spurtivu, u HAC ghjucherà monda, dumenica, in Beauvallon, terzu di a classifica (à dui punti). L’occasione, forse, di francà un altru passu…
