Minaciatu qualchì tempu, u Giru di Corsica hè statu mantenutu. A cumpetizione, corsa francese di i campiunati di u mondu, era in difficultà dopu à e dumande di u Giapponu è u Cile d’entre in u calendariu. Ma a Federazione naziunale hà sustenutu u Giru di Corsica, mantenutu per u 2019. A Corsa parterà da Porti-Vechju u 29 di marzu per ghjunghje in Calvi u 31.
Dapoi u mese di sittembre è a dumanda di u Giapponu è u Cile d’entre in u calendariu di i campiunati di u mondu, u Giru di Corsica, famosa corsa chì face parte, ci vole à dì la, di u patrimoniu di u paese, era assai minaciatu. Si sà chè oghje, ghjè u soldu chì supraneghja l’interessi spurtivi. Tandu si pudia pensà chè u Giru avia da esse cacciatu torna una volta, dopu à quattru anni. Masimu chè i prumutori di u WRC ùn vulianu micca mette 15 corse à u prugramma. È tandu, hè a Corsica chì pudia pacà issa decisione. Ma a squadra di Nicolas Deschaux, presidente di a Federazione Francese, hà sustenutu u cartulare corsu. « U Giru di Corsica, spiega u capimachja di a FFSA, face parte di u patrimoniu mundiale di a disciplina. N’hè dinò un spechju impurtante. Era logicu di mantenelu… »
In fine, u Cunsigliu Mundiale di u Sportu Automobile, adunitu issa settimana, hà decisu di purtà à quattordeci u numaru di corse, fendu entre à u Cile. U Giru di Corsica, corsa francese di a manifestazione internaziunale, ellu, hè privistu à a fine di marzu di u 2019. Cù un percorsu appena cambiatu. Parterà da Purti Vechju u 29 di marzu per ghjunghje in Calvi dui ghjorni dopu, passendu per Bastia. Una settimana nanzu ch’in u 2018. Per lascià a piazza à u Cile, invitatu novu in i campiunati di u mondu…
