Successu maiò per u gran premiu di a cità d’Aiacciu

S’hè compia l’edizione 2019 di u Gran Premiu di a Cità d’Aiacciu. Un’edizione impurtante, masimu cù, ghjustu nanzu, trè ghjorni di mostra à l’occasione di u « Giru Naziunale di a Bucciata » chì hè sbarcatu in Aiacciu cù trè campioni di u mondu di a disciplina. U Gran Premiu di a Cità d’Aiacciu, ellu, hà adunitu seicentu è cinquanta ghjucadori intornu à una cumpetizione seguitata, malgratu u caldu, da un publicu numarosu. A staghjone di e bucce hè principiata in a Cità Imperiale.

Una settimana dedicata à a bucciata, eccu ciò ch’elli anu campatu tutti i passiunati di a disciplina nantu à a Piazza Miot d’Aiacciu. Un’urganisazione appruntata da a squadra di l’associu di u Gran Premiu di a Cità d’Aiacciu è masimu l’amicu Alanu Peraldi, à l’origine, d’altronde, di a ghjunta di « u Giru naziunale di a bucciata » trè ghjorni nanzu. À u prugramma, da vennari à luni, trè ghjustre, u premiu Weldom, u premiu di a cità d’Aiacciu è un premiu dedicatu à e femine. In tuttu, 650 ghjucadori.

Una ghjustra abbastanza stretta cù una surpresa maiò, l’elimnimazione, in quartu di finale, di una di e squadre favurite (Basile Paoli, Nico Tarrassenko et Kévin Bonvarlet) battuta da a squadra finalista (2-13). In finale, ghjust’à puntu,  Antò Solinas, Lisandru Pifferini è Romuald Montrichard anu vintu di fronte à  i fratelli Ghjaseppu è Emmanuel Deleria et Robert Santarelli (13-9). U premiu Weldom hè statu dinò impurtante (100 participanti). In finale, Kévin Firroloni, u so fratellu Yohan è David Rabazzani perdianu 10 à zeru nazu di retablisce a situazione è di vince d’un puntu (13 à 12). Una bella finale.

Prussimu appuntamentu, u 14 di lugliu per u famosu cuncorsu internaziunale nantu à a piazza di u Diamante…