À l’occasione di l’Assemblea Federale di a Federazione Francese di Football urganizata stu sabbatu in Aiacciu, u presidente di a FFF, Philippe Diallo, hà cuncessu una intervista à a nostra redazzione. Riforma di u football francese, diritti televisivi, creazione di a Liga 3 prufessiunale0, avvene ecunomicu di i club è situazione di u football corsu : u patrone di u football francese detalla a so strada maestra.
– Signore Presidente, st’Assemblea Federale si tene in un cuntestu ecunomicu delicatu per u football francese. Chì hè u vostru statu d’animu ?
- U football francese passa in verità per una perioda cumplicata. Dapoi a crisa di u Covid, avemu subitu parechji scossi di fila : l’arrestu di u campiunatu in u 2020, l’episodiu Mediapro, po e difficultà liate à i diritti audiovisivi. Oghje, l’ingressi di i club prufessiunali sò calati assai mentre chì e so cariche fermanu elevate. Ci vole à riformà u nostru mudellu per ridà visibilità è stabilità à i nostri club.
– Dumandate regularemente una riforma di a guvernanza di u football prufessiunale. Perchè ?
- Perchè ci vole à appruntà l’avvene. A pruposta di lege attualmente discussa à u Parlamentu hà per scopu di mudernizà a nostra urganizazione è di creà e cundizione d’un rilanciu ecunomicu durevule. Ci vole in particulare à riduce certe disparità è permette à i club di ritruvà un quadru più stabile per sviluppassi.
– À chì puntu sò e discussione in quantu à i diritti di diffusione di a Cuppa di Francia ?
- Oghje i diritti sò megliu valorizati chè nanzu. In quantu à a diffusione, cuntinuemu i scambii cù France Télévisions in un cuntestu chì hè statu cumplicatu sti mesi passati. E discussione avanzanu è spergu chì truveremu prestu un accordu chì permetterà di guarantisce à a Cuppa di Francia una visibilità à l’altezza di a so impurtanza in u patrimoniu di u football francese.
– Altru sughjettu d’attualità : e prime di a squadra di Francia per a Cuppa di u Mondu. U cartulare hè statu risoltu ?
- Avemu avutu parechji scambii assai custruttivi cù i ghjucadori. E discussione si passanu in un clima serenu è rispettuosu. U mo desideriu hè chì tuttu sia definitivamente regulatu nanzu à a partenza di i Bleus, per chì a squadra possa dopu cuncentrassi solu nant’à l’ubbiettivu spurtivu.
« A Liga 3 ùn deve micca pruduce e difficultà chì cunniscimu oghje »
– A creazione di a Liga 3 prufessiunale hè una di e grande riforme presentate durante st’Assemblea. Chì hè a vostra ambizione ?
- Quandu avemu lanciatu stu prugettu cù l’inseme di l’attori cuncernati, aghju fissatu trè ubbiettivi : creà un campiunatu innuvatore, territurializatu è soprattuttu durevule. Ùn vuliamu micca simpliciamente ripruduce ciò chì esiste digià in Liga 1 o in Liga 2. Avemu travagliatu assai nant’à a regulazione ecunomica. L’idea hè simplice : impedisce à i club di spende più di ciò ch’elli pussedenu. Metteremu in piazza un plafonamentu prugressivu di a massa salariale, un sistema di tassazione di i superamenti è un mecanismu di prefinanziamentu di e stagioni. Vulemu evità e fallite è offre à i club un ambiente stabile per sviluppassi. Passemu da circa 7 milioni d’euri d’aiuti à più di 12 milioni per i club cuncernati. Hè un sforzu impurtante di a Federazione per assicurà u successu di sta nova divisione.
– A Liga 3 servirà dinù da laburatoriu d’innuvazione ?
- Assolutamente. Vogliu ch’ella sia una cumpetizione attrattiva è muderna. Hè in stu spiritu chì introducemu, frà altre cose, i challenge video à l’iniziativa di l’allenatori. Pensemu dinù à altre evoluzione ispirate da sporti cum’è u rugby per rende u ghjocu ancu più leggibile è spettaculare.
« A Corsica hà sempre a so piazza in u football prufessiunale francese »
– Nisun club corsu ùn ghjucherà in Liga 1 o Liga 2 a stagione chì vene. Chì sguardu purtate nant’à sta situazione ?
- Hè ben intesa una delusione. A Corsica hè stata longu tempu una terra forte di u football francese. Ùn ci hè tantu tempu, quattru club corsi evoluavanu in e duie prime divisione. Rapurtatu à a pupulazione di l’isula, era qualcosa d’eccezziunale.
– Ci vole à inchietassi per l’avvene ?
- Innò. Pensu simpliciamente chì u football corsu traversa una perioda più difficiule. Mantene numerosi punti forti : una cultura footballistica putente, una identità affirmata è una eccellente capacità di furmazione. Sò cunvintu chì i club corsi ritruveranu a so piazza à u più altu livellu.
– Certi osservatori stimanu chì l’evoluzione ecunomica di u football penalizeghja di più i club di territorii più mudesti cum’è a Corsica. Spartite st’analisi ?
- U football prufessiunale hè cambiatu assai. I bilanci sò diventati assai più impurtanti è l’azzionariati si sò internaziunalizati. Questu rende naturalmente a cuncurrenza più difficiule. Hè per quessa chì travagliemu à riduce certe sfarenze è à priservà un football pupulare capace di permette à tutti i territorii di firmà cumpetitivi.
– U Sporting Club di Bastia integrerà a futura Liga 3. A Corsica beneficerà d’un accumpagnamentu specificu ?
- Iè. Tenimu contu di e custrette liate à l’insularità. I spiazzamenti rapresentanu un costu supplementariu per i club corsi. Hè per quessa chì aiuti cumplimentarii sò previsti per accumpagnà a so participazione à e cumpetizione naziunale.
– Parechji club corsi denuncianu regularemente un sintimu d’inghjustizia in quantu à l’arbitraghju o certe sanzione disciplinarie. Chì li rispondite ?
- Li rispondu chì ùn esiste nisun trattamentu differenziatu. L’insularità ùn hè micca un fattore di discriminazione. Quandu l’ACA hà attraversatu una perioda estremamente difficiule, a Federazione s’hè mubilizata à u so fiancu. Accumpagnemu tutti i club cù a listessa primura d’equità, ch’elli sianu corsi, bretoni o alsaziani.
– U dibattitu annantu à una ricunniscenza ufficiale di a selezzione corsa torna regularemente in l’attualità. Chì hè a vostra pusizione ?
- Vogliu prima aspettà l’eventuale evoluzione istituzionale riguardante a Corsica. Dopu, ci vulerà à analizà e pussibilità offerte da u quadru legale è regulatore. Ma ci vole dinù à guardà e realità ecunomiche. L’esperienze purtate in altrò mostranu chì fà campà una selezzione regiunale impegnata in cumpetizione internaziunale rapresenta un costu impurtante chì pò indebulisce e strutture lucale.
– Chì missaghju vulete indirizzà oghje à u football corsu ?
- A Federazione hè pienamente à fiancu à i club corsi. A Corsica face parte integrante di a storia di u football francese è cuntinuerà à ghjucà ci un rollu impurtante. Malgradu e difficultà attuale, sò cunvintu chì u football corsu hà tutte e qualità per rimbalzà prestu.
