30In un cuntestu ecunomicu difficiule per tuttu u football francese, l’urganisimu di cuntrollu hà decisu di ùn impone à u club chè un simplici inquadramentu di a massa salariale è di l’indennità di trasferimentu, cum’ellu era previstu da u SC Bastia in u so bugettu. Nisuna sanzione più pesante nè altra restrizzione supplementaria ùn hè stata presa.
Stu marti 24 di ghjugnu, u Sporting Club di Bastia s’hè prisentatu davanti à a Cummissione di Cuntrollu di i Club Prufessiunali (DNCG), l’urganisimu di a Federazione Francese di Football incaricatu di surveglià a salute finanziaria di i club prufessiunali. À l’ordine di u ghjornu figuravanu l’esame di i conti di u club per l’eserciziu 2024-2025 è a validazione di u bugettu previsionale per a staghjoni 2025-2026.
In un clima ecunomicu chì ferma delicatu per u football francese, marcatu da a calata di i diritti televisivi è da l’incertezze ligate à certi mudelli ecunomichi, a DNCG si mostra particularmente attenta iss’annu. Malgradu issu cuntestu, l’urganisimu hà pigliatu una sola misura contr’à u Sporting : l’inquadramentu di a massa salariale è di l’indennità di trasferimentu, in cunfurmità cù e previsione bugettarie presentate da u club.
Sta decisione, luntana d’esse una sanzione, mostra chì a gestione di u club hè stata cunsiderata cum’è sana è ben cuntrullata. U club bastiacciu cunserva cusì tutti i mezi necessarii per preparà l’intersaison, mantenendu à tempu una linea di rigore finanziaria. Nisun interdettu di recrutamentu nè altra misura più severa ùn hè stata imposta.
U Sporting pò dunque appruntà cù serenità a preparazione di a staghjoni 2025-2026 di Ligue 2 BKT. Dopu à una staghjoni à mezu tonu, i dirigenti bastiaccii volenu rinfurzà l’effettivu è custruisce un prugettu ambiziosu, à l’altura di l’aspettative di u publicu di Furiani.
Stu passaghju riesciutu davanti à a DNCG raprisenta una prima tappa impurtante in a custruzzione di u novu capitulu spurtivu di u club. Cunferma dinù a vuluntà di stabilità è di prugressu mustrata da a direzzione. U SC Bastia hà oramai e mani libare per appruntà u so mercatu di i trasferimenti è affinà a so urganizazione nanzu à a ripresa di u campiunatu.
