L’evenimentu Biera è Ballò hà da vultà in Capicorsu per una seconda edizione urganizata in Macinaghju, nant’à a cumuna di Ruglianu. Dopu à una prima edizione riesciuta in u 2025, l’urganizatori volenu cunfirmà l’entusiasmu suscitatu l’annu passatu cù un appuntamentu sottu à u segnu di u ballò, di a cunvivialità è di a spartera.
Quasi 300 persone sò aspettate stu sàbatu u 27 di ghjugnu, da e 4 ore à e 10 ore di sera. Dodici squadre, vale à dì vicinu à 120 ghjucadori, participeranu à u turneu durante sta ghjurnata di festa.
Natu in Macinaghju, u prugettu hè purtatu da Jean-François Ricquebourg è Wassim El Makrini, dui giovani assai attaccati à u so paese nativu è à a so microregione. In un territoriu rurale cum’è u Capicorsu, a so ambizione hè di prupone un evenimentu pupulare chì permetta à l’abitanti di ritruvassi in giru à un mumentu federatore chì riunisca tutte e generazione.
Biera è Ballò
U nome di l’evenimentu ne riassume perfettamente u spiritu : « Biera » per u latu festivu è cunviviale, « Ballò » per u turneu di ballò. L’ubbiettivu hè di creà un appuntamentu intergeneraziunale apertu à tutti.
Per sta seconda edizione, Biera è Ballò tene a so identità d’origine, rinfurzendu à tempu a so urganizazione.
Una nova edizione 2026
I fundatori ponu cuntà nant’à u sustegnu di partenarii digià prisenti à a prima edizione, ma dinù nant’à novi attori chì anu decisu di raghjunghje l’aventura. In tuttu, cinque partenarii accumpagnanu u prugettu quist’annu. Sicondu l’urganizatori, u so sustegnu permette « di prufessiunalizà ancu di più l’evenimentu, mantenendu à tempu a so identità lucale è pupulare ».
Frà issi partenarii si trovanu in particulare u SC Bastia è Pietra, digià assuciati à l’evenimentu l’annu passatu. In un cumunicatu, l’urganizatori insistenu nant’à l’impurtanza di sta cullaburazione :
« U SCB raprisenta assai di più chè un club di ballò in Corsica. Face parte di l’identità pupulare di l’isula è tene una piazza particulare in u core di parechji Corsi. Per Biera è Ballò, a presenza di u SCB hè una scelta naturale : u turneu hè purtatu da giovani appassiunati di ballò, attaccati à u Sporting è à i valori ch’ellu raprisenta. »
È aghjustanu :
« Stu partenariatu s’inscrive naturalmente in u spiritu di Biera è Ballò : cunvivialità, identità corsa, festa è arradicamentu lucale. »
Novi partenarii venenu dinù à rinfurzà l’evenimentu quist’annu, trà i quali Hestia pè u dispusitivu di securità, u Domaine Pozzu pè a risturazione è Zilia pè l’approvvigionamentu in acqua. L’associu Mission Blouse Blanche, purtatu da i studienti di l’IFSI, serà dinù presente durante tutta a manifestazione.
Lanciatu in u 2025, Biera è Ballò hà a vucazione d’inscrive si à longu andà in u paisaghju assuciativu è festivu di u Capicorsu. L’urganizatori volenu fà ne un appuntamentu annuale per animà u so paese nativu è cuntribuisce à u sviluppu è à u dinamisimu di i territorii rurali.
Apertu à tutti, l’evenimentu permetterà à ognunu di participà à u turneu o simpliciamente di vene à assiste à e partite, manghjà un buccone, beie un bichjeru o gode di l’ambienza calda è cunviviale chì serà pruposta durante tutta a ghjurnata.
