In st’epica delicata induve u SC Bastia si trova à l’ultimu postu di a Liga 2, l’allinatore Benoît Tavenot averà da fà senza u serviziu di u so attaccante di punta è di u so difensore cintrale.
Per ciò chì tocca à Nicolas Parravicini, l’attaccante talianu ghjuntu st’estate è in difficultà fisiche maiò durante a preparazione, l’esamini di luni anu rivelatu un principiu di pubalgia. Què significa riposu sin’à a prossima pausa internaziunale chì ghjunghje u 10 d’ottobre.
Per Gustave Akueson, surtitu à a 72a minuta durante a partita in Amiens, vennari u 12 di settembre, si tratta d’una “storta grave” di u ghjinochju dirittu chì richiede esamini supplementarii. Hè un male minore quandu certi temianu una rumpitura di i legamenti cruciati, ma una indisponibilità chì puderia durà sei à ottu settimane.
Christophe Vincent (caviglia) è Florian Bohnert (coasta), assenti in Boulogne, puderianu esse presenti sabbatu 20 di settembre per a prossima partita in Montpellier.
