Malgratu una squadra guasgi cumpletta, l’Aiaccini, troppu debuli à u nivellu uffensivu, ùn anu pussutu batte à Parrighji, più realistu. Settesima scunfitta per l’ACA chì s’avvicina di più in più da a D2.
Divia esse un macciu di a rivolta. Ancu s’è un contenutu hè statu megliu ch’à l’occasione di l’altri macci, l’Aiaccini ùn anu pussutu rivalizà cù Parrighjini più realisti. I « bianchi è rossi » anu tenutu tuttu u primu tempu nanzu di fiascà. peccatu…
Pocu debulezza in issu principiu di partita cù duie squadre ch’anu da fà un « chjama è risponde durante tuttu u primu tempu. Di fattu, l’Aiaccini entrenu bè insu macciu di fronte à una squadra parrighjina chì, s’ella piglia, à pocu à pocu, a suprana, mettenu un pocu « u pede » (dui avertiti in e prime minute). L’ACA, induve Soukouna face parlà a so classa, cerca à sviluppà u so ghjocu cù qualchì occasione (stucciu di Saïd, 2a, Ciao Adrio da sopra à a cabbia 8a, o Essaghir, ripigliatu à l’ultimu mumentu da u purtieru parrighjinu, 15a. Un cuntenutu interessante di fronte à una squadra chì hà da risponde (dui pali di fila di Soumaré è Ndiaye, 15a è un’occasione salvata da Menvouddidiot dopu à una perdita di ballò in u spaziu di u purtieru. In fine, i Parrighjini anu da marcà nanzu àu mezu tempu. Dopu à un’occasione di Soukouna, l’avversarii partenu in contru è Dhee mette u ballò in a cabbia aiaccina (18a).
Parrighji più realistu
I Parrighjini mettenu subbitu dopu à a ripresa, appena di pressione nantu à l’Aiaccini per circà à marcà torna una volta è assicurà si i trè punti. Piglianu, cum’è in prilu tempu, a suprana nantu à i « bianchi è rossi ». Eppo, Soukouna trappasseghja nantu àu fiancu manca è dà un rigalu à Dembélé chì retablisce a parità (24a). Si pare chè l’Aiaccini anu fattu u più duru. Mancu à pinsà la. L’avversarii ripiglianu u cuntrolu di l’operazione è Dhee marca, sta volta, nantu à colpu francu (28a). L’ACA reagisce cù un bellu stucciu di Soukouna paratu da u purtieru parrighjini. L’avversarii anu da cunfermà a so superiorità cù una terza realisazion, sta volta di Diarra da luntanu (34a). L’Aiaccini anu da pigliàtutti i risichi in fine di partita ghjuchendu in power play. L’occasione, per u purtieru avversu di marcà da a so cabbia à l’ultima seconda. Settesima scunfitta per l’ACA chì stà à l’ultima piazza di a classifica.
Sala di u Palatinu
ACA-Paris ACASA 1-4 (0-1)
Spettatori: 200 à pocu pressu
Arbitru: M. Lang
Realisazione:
ACA: Dembélé (24a)
Dhee (18a è 28a), Diarra (34a), Diagouraga (40a)
Avertiti
ACA: Soukouna (7a)
Parrighji:
Soumaré (2a), Diallo (6a)
Cinque di principiu
ACA: Menvouiddidiot- Ciao Adrio, Saïd, Kelson, Essaghir-ent: A de Pietro
Paris ACASA: Diagouraga- Diarra, Ndiaye, Borges, Soumaré-ent: M. Serpa
