Morhad Amdouni batte a prova suprana di l’ora!

L’atletu purtivechjacciu hà battutu a prova suprana di Francia di l’ora sabbatu scorsu in Lucciana. Cù un percorsu di vinti chilometri è sette centu è settandui metri, batte l’anziana prova di Bertrand Itsweire…

Morhad Amdouni hè entrutu in a storia di l’atletisimu corsu è francese sabbatu scorsu in Lucciana. Attaccà si à a prova suprana di l’ora, masimu ch’ella tenia dapoi trenta ann, ci vulia fà la. Battela, era un’altru affare. L’atletu purtivechjacciu hà pigliatu u so curaggiu in manu per batte à Bertrand Itsweire, ch’avia fattu vinti chilometri è sei centu è un metri, in u 1990. Morhad n’hà fattu centu di più. À mezu à tutti i soi, a so famiglia è tutti quelli di l’AJB chì l’anu aiutatu durante u percorsu, hè pertutu à ottu ore menu tredeci di sera. Purtatu da uni pochi di « levri » (cumpagni incaricati di fà lu tene u ritimu), hà pigliatu una partanza bona. È s’ellu hè statu difficiule nanzu à a fine, hà pussutu tene per vince di qualchì ancata. « Sò assai felice d’avè riescitutu issa prova quì ind’è mè è à mezu à i mei.  » Di colpu, tutti l’imbrogli di i mesi passati sò daretu. L’atletu isulanu entre in a storia è pò apre d’altre pagine di a so carriera…