Marcu Aureliu Armani : « vulemu dà un soffiu novu à u TCA »

À trentasette anni è dopu à una furmazione in Staps  in Corti è  Ecchisi, Marcu Aureliu Armani hè vultatu in a so cità  in Aiacciu induve ellu mette, dapoi qualchì annu, tuttu u so sapè fà à u serviziu di u Tennis Club di u Casone. Una struttura ch’ellu ci prisenta…

Comu si passa, oghje, à u TCA ?

L’affari anu scambiatu dapoi uni pochi d’anni. Sò ghjunti dirigenti novi. Pensu à Antoine Vinier-Orsetti, presidente, Jeff Colonna sicretariu amministrativu o d’altri. À u nivellu spurtivu ghjust’à puntu, semu trè furmatori : Gilles Ponzevera, Gregory Piredda ed eiu. Accumpagnati da trè educatori (Armand Escoffier, Saveria Pozzo di Borgu è Bruno Ottavi). U scopu hè di dà un soffiu novu à u club.

Di chè manera ?

A notra primura hè a furmazione di i ghjovani. Avemu, oghje, à pocu pressu trè centu licenziati, dui centi sò zitelli da quattru à diciottu anni. Quattru anni fà, ùn eranu chè quaranta cinque. Avemu dighjà fattu una stradone. Ma ci tocca à avanzà dinò. I più chjuchi s’intrenanu un’ora à settimana, quill’altri un’ora è mezu. In fine, quelli di u centru d’intrenamentu anu di più. U sport hè a scola di a vita. Tuttu u monde si deve sente ind’è ellu à u club. Cusì, circhemu à esse di più attrattivi è à travaglià ind’una ambianza bona. Ci hè avà a ghjustra di Natale. Dopu ci serà una vesparina maiò per tutti i zitelli è un aperitivu per i parenti.

U tennis oghje in Corsica ?

U nivellu mi pare interessante. Ci sò i porta bandera cum’è Laurent Lokoli, Clothilde De Bernardi. S’affacca avà a ghjovana Alice Battesti. Cuntemu  pocu pressu una vintena di ghjucadori ch’ùn sò micca male. Ci sò ghjustre interessante chì mettenu in vale a disciplina è un bellu travagliu di furmazione. Ci vole à cuntinuà in issu sensu quì.