Dopu à a so parità, dumenica scorsa in Furiani, i “Verdi” di l’USCC si sò pigliati u titulu di campione di Regiunale Una, un nivellu chè issa squadra mitica ùn avia più cunnisciutu dapoi sette anni. Un’altra sfida s’appronta avà per l’omi di David Faderne, chì hà fattu, cù a squadra dirigente, un travaglione in quattru anni…
A squadra chì addunisce u rugione di u Curtinese ritrova, dopu à sette anni, un nivellu naziunale. Bastava una parità per assicurà li a so piazza di capiifila di a classifica, hè stata fatta dumenica in Furiani. Un’accessione chì mette in vale u travagliu fattu da a squadra dirigente senza sminticà à David Faderne. L’anzianu attaccante è addestradore di i ghjovani di l’ACA, in postu dapoi quattru anni, hà riesciutu a so sfida. Hè vera chè a squadre curtinese saria di più à a so piazza à u nivellu naziunale. Ma, ghjè, oghje, un’altra sfida chì l’aspetta, quella di mantenesi à issu nivellu, cù, perchè micca, u scopu à più o menu longu andà, di ghjucà à un nivellu ancu più altu. Cù un gruppu, fattu, per a miò parte, di ghjucadori curtinese o di u circondu (Vivariu, Multifau, Ruspiglianu), a sfida nova serà, nanzu à tuttu, d’arricchiscelu cù quattru o cinque ghjucadori corsi per tene una certa identità. Quindeci anni dopu à u so ultimu titulu, ciò chì l’avia permessu, à l’epica in CFA2 (2006) di ghjucà un famosu trentaduisemu di finale di a cuppa di Francia di fronte à Rennes (L1), a squadra curtinese s’appronta à scrive un’altra pagina di a so bella storia. Un piacè tamantu per Dumenicu Colonna…
