Laurent Lokoli: « A più bella vittoria di a me carriera »

L’atletu bastiacciu hà vintu l’ottesima ghjustra internaziunale d’Aiacciu dumenica scorsa nantu à i terrenu di u Tennis Club di Mezavia chì urganizava a cumpetizione cù u sustegnu di a municipalità d’Aiacciu Ma l’affare fù abbastanza duru per un 500u ghjucadore francese, supranatu a prima parte (3-6) da u Reuniunese Quentin Robert, è à un ghjocu di perde u secondu è a partita (2-5). Finalmente, hà trovu l’energia necesseria per fà una « remontada » -una parolla à a moda-, salvà très balle di macciu, ripiglià si (5-5) è cù e qualità ch’è noi li cunniscimu, vince per a prima volta issa ghjustra quì (3-6, 7-5, 6-3). Un scenariu ch’ellu ci spiega…

Avete fattu un ritornu tamantu di fronte à Quentin Robert?

Forse u più bellu di a me carriera. À 2-5 in a seconda parte, mi sò dettu ch’eru in traccia di passà à cantu à a me finale. È di pensà ghjustu à ghjucà u me ghjocu senza pinsà à u restu. Ellu, ùn ùn mancava nulla mentre ch’eiu, ùn ci eru micca. Eppo, ùn la so perchè, aghju vistu ch’ellu t’avia a pressione di finisce. Tandu mi sò dettu: perde per perde, omancu cù l’onore. Aghju ghjucatu i punti senza calculà…Serà forse un destinu.

Chì riprisente per voi di vince l’Open d’Aiacciu?

U publicu ùn la sà micca ma quand’è tù ghjochi à u tennis, sè solu nantu à u terrenu. Ùn poi micca cuntà nantu à qualchissia d’altru. È què, di fronte à un scenaru cusì,  dumanda un’energia tamanta. Ùn la so induve sò andatu à cercà là ma hè ghjunta. Forse mi sò messu troppu pressione nantu à e spalle à vulè vince sta finale. Tutti l’anni, dapoi u principiu di sta cumpetizione, tuttu u mondu m’aspetta, tutti l’anni ùn sò micca capace d’impone u me ghjocu. Quest’annu era forse u meiu. Dapoi sei mesi, aghju travagliatu monda per riesce. È u fattu di vince quì, una settimana dopu à Bilbao, hè una gioia tamanta. A più bella vittoria di a me carriera.

L’affare si passa megliu per voi dapoi sei mesi?

À u nivellu di i resultati, iè ma daretu, ci hè un travagliu tamantu. Di più, ci hè vulsutu à gestisce critiche di a ghjente. ma  sò forte nentru à mè. Ùn sò statu mai toccu da tuttu què. Aviu dettu, dui anni fà ch’eiu vultaria nantu à a scena internaziunale è chì i resultati avarianu da seguità. Ci serà una classifica nova d’aostu, seraghju intornu à a 350a piazza. Aghju da cuntinuà à travaglià per avanzà. Hè u me percorsu forse u megliu dapoi ch’aghju principiatu à ghjucà à u nivellu prufessiunale. Aghju battutu ghjucadori chì facenu e qualificazione di « Chelem » maiò è chì ghjucanu propiu bè. Hè dinò a prima volta ch’eiu vinciu duie ghjustre di fila. Sò elementi à piglià in contu. Ma tuttu và lestru in u mondu spurtivu…