Dopu à a decisione di a DNCG d’escluda l’ACA da tutte e cumpetizione naziunale, l’uffiziu esecutivu di a Lega di ballò amatori hà rifattu u calendariu di u girone H di Naziunale 3 induve u club aiaccinu ùn ci hè più.
L’uffiziu esecutivu di a Lega di ballò amatori hà procedutu, stu luni 18 d’aostu, à l’aghjurnamentu di i campiunati di Naziunale è di Naziunale 3 pè a prossima stagione.
Dopu à l’esclusione di l’AC Ajacciu da tutte e cumpetizione naziunale da parte di a Direzzione naziunale di u cuntrollu di gestione (DNCG), a Federazione francese di ballò hà decisu in primu tempu di lascià u campiunatu di Naziunale à 17 club è di ùn ripiglià nisuna squadra à a piazza di u club corsu. À ogni ghjurnata, ci sarà dunque una squadra esente è, à a fine di a stagione, solu l’ultime duie seranu retrocesse.
In Naziunale 3, l’ASPTT Dijon avia vintu u so cunflittu cù a FFF nant’à a pruposta di u CNOSF (Cumitatu naziunale olimpicu è sportivu francese) per esse reincorporatu in stu campiunatu.
U club di Burgogna rimpiazza dunque numaricamente a riserva di l’AC Ajacciu in u gruppu H per a ripresa di u campiunatu stu sabbatu 23 d’aostu.
Duranti sta stessa riunione, l’uffiziu esecutivu hà precisatu ch’ellu esaminerà dopu e situazioni di l’altre squadre di u club aiaccinu impegnate in campiunati naziunali, vale à dì u D1 Futsal è e squadre di ghjovani, U17 è U19.
L’ACA hà torna dui ghjorni per fà appellu contr’à sta decisione d’esclusione da tutte e cumpetizione naziunale da parte di a Direzzione naziunale di u cuntrollu di gestione.
