L’AS Jardins de l’Empereur invitatu da Rémy Cabella in Saint-Etienne!

Deci ghjovani chì facenu parte di a squadra di l’AS Jardins de l’Empereur, sò stati invitati, cù i dirigenti da Rémy Cabella, capighjucadore di Saint-Etienne, per passà quattru ghjorni in l’ambianza di i « Verdi ». À u prugrama, u macciu Saint-Etienne-Montpellier, vennari, a visita di u museu, di u stadiu Geoffroy Guichard è di a buttega, sabbatu, ghjochi diversi dumenica è visita di u centru di l’Etrat (intrenamentu è furmazione) luni per compie. Un mumentu maiò per tantu zitelli…

Ci sò mumenti maiò in a vita d’un zitellu. Quelli campati da deci ghjovani di l’AS Jardins de l’Empereur (da ottu à vintunu anni) ne face parte. Cumpare di a squadra, chè a so famiglia hà campatu à l’Empereur, Rémy Cabella, numaru sette di l’AS Saint-Etienne, hà invitatu sedeci parsone in tutti (ghjovani è dirigenti) à passà quattru ghjorni in u Forez. U sughjornu hà principiatu cù u macciu di fronte à Montpellier. Di sicuru, tuttu u mondu era dillusu di a scunfitta ma anu scupertu, quantunque, un stadiu tamantu è bellu carcu. U lindumane, dopu à un ripastu cù a famiglia Cabella è i so sociari, anu visitatu u museu di i Verdi, scuprendu a storia di l’ASSE cù l’aiutu di Philippe Gastal, sturianu di a squadra. Dopu, ghjè u stadiu ch’anu pussutu scopre nanzu di compie a ghjurnata à a buttega cù qualchì rigalu (maglietta è ballò) offertu da u capighjucadore. U lindumane hè statu dedicatu à i ghjochi (Laser Game, lanciamentu di piole, sumò…). In fine, per compie issi quattru ghjorni, a delegazione hà visitatu e stallazione di l’Etrat (centru d’intrenamentu è di furmazione), salutendu à Jean-Louis Gasset, Ghislain Printant è uni pochi di ghjucadori. « Ringraziemu à Rémy per issi mumenti di Gioia immensa per i nostri zitelli, spiega Djamel Bassa, presidente di l’AS JDE, dinò à Hector u so babbu per u so impegnu maiò, è dinò a squadra di l’AS Saint-Etienne per u so accoltu. Un ringraziu maiò à tutti… »