Stadiu Marcel Tribut
Dunkerque-ACA (1-0)
Tempu frescu
Arbitru: M. Paradis
Realisazione: Bardeli (45+1), Bah (52a)
Avertiti: Dunkerque: Anziani (19a), Yassine (22a) , ACA: Jabol (14a), Mangani (37a), Vidal (48a)
Dunkerque : Balijon- B. Youssouf, Ba, Gambor, Bilingi- Yassine (Ghrieb 71a), Anziani, Gbamin (Keita 66a), Bah- Bardeli-Courtet-ent: P. Ferreira
ACA : Michel- Youssouf, Avinel, Vidal, Quemper- Escartin (Puch 58a)- Touré (Soumano 68a), Jabol, Mangani (cap, Ibahyi 58a), Jacob- Touzghar (Nouri 82a) ent: O. Pantaloni
Debuli è senza grinta da u principiu à a fine di u macciu, l’Aiaccinu registreghjanu una scunfitta in Dunkerque, a seconda dopu à quella in Troyes u 13 di ghjennaghju. Un macciu chì risicheghja di fà male.
Ritimu debule, occasione pocu è micca, grinta dinò, issu macciu in Dunkerque avia tutti di a trappula, sta sera à u stadiu Marcel Tribut. Un macciacciu per una squadra « bianca è rossa » à l’usu fantasima durante a maiò parte di u tempu. Una squadra aiaccina chì s’hè fatta scuzzulà da i ghjucadori di u Nordu ch’ùn avianu mai vintu in casa soia. Un primu tempu ci dà dighjà l’impressione chè i « bianchi è rossi » ùn ci sò micca. Fora d’un tiru di Youssouf (5a), l’Aiaccini ùn seranu mai periculosi. I minuti passanu è à pocu à pocu, Dunkerque piglia cunfidenza. Dopu à un colpu francu da sopra a cabbia di Michel (38a), i lucali finiscenu più forte. Un calciu d’angulu tocca a traversa (39a). L’ACA ùn piglia micca cunscenza di u periculu. A sintenza ùn tarde micca. Bardeli stuccia un colpu francu à 2à metri di a cabbia, è nette a tele di ragnu di Mathieu Michel (45+1).
Senza reazzione
À a ripresa, l’ACA ùn dà micca l’impressione di reagisce. Peghju. Dopu à un ballò di Bardeli, Bah s’avanza è stuccia di 25 metri. Troppu cortu, Michel hè senza reazzione (55a). Difficiule di fà peghju per una squadra aiaccina veramente à cantu. Pantaloni face entre à Soumano è Ibahyi chì face i so primi passi in Lega duie ma fora di qualchì ballò in u spaziu di penalità, Balijon passa una serata tranquillu. Ibahyi d’una bella culumbella, averà una di e sole occasione aiaccine di a partita à…sette minuti di a fine (83a). Nanzu à un stucciu di Soumano (86a) è una capata di Nouri (88a). L’ACA fala à a 10a piazza di a classifica. T’hà quattru ghjorni per appruntà u so prussimu macciu di fronte à Concarneau.
