Autori d’un bellu macciu è sopratuttu cù a manera in più, l’Aiaccini anu battutu à Guingamp in Timizolu (3-0). Un maccione chì li permette di cuntinuà à sperà. Si stallanu à a cinquesima piazza di a classifica à parità cù Caen è Pau.
Vince è avvicinà si da i cinque primi di a classifica, eccu u scopu di l’ACA di fronte à Guingamp, una squadra chì n’hà più persu contru à i « bianchi è rossi » dapoi ondeci macci (2008 l’ultima vittoria). À l’arrivu, a vittoria, a manera è 3-0 in Timizolu dopu à trè anni (u 21 d’aprile di u 2021 di fronte à Niort). L’Aiaccini anu ragiò di teme issa squadra brittona postu ch’ella entre u megliu in a partita, cù un ghjocu lestru è in prima intenzione. L’ACA cerca à sviluppà u so ghjocu ma t’hà pocu occasione fora d’un centru di Jacob è Touzghar troppu cortu per mette u capu (12a). À pocu à pocu, l’ACA piglia a
suprana è dopu à u sgagiamentu di u purtieru brittonu, Youssouf mette una capata di passà ghjustu à cantu a cabbia (20a). L’Aiaccini cuntinueghjanu. Dopu à una magnifica passa di Sakhi, Ibayi entre in u spaziu di penalità è si piglia una spallata di Sivis. M. Paradis dà un penalty logicu à l’ACA, marcatu da Ibayi (27a). L’En Avant prova à reagisce cù un bellu tiru direttu senza troppu difficultà per a difesa « bianca è rossa (32a). I Brittoni chì si ripiglianu in fine di primu tempu. Dopu à un ballò nantu à u fiancu drittu, Sivis trapasseghja è passa à Merghem chì manca u so stucciu (40a). À u mezu tempu, l’ACA hà fattu ciò ch’ellu ci vulia.
B. Touré entre è marca
In secondu tempu
, u scenariu ùn scambia micca. Una squadra brittona sempre periculosa cù issu centru di Merghem cacciatu da Avinel (50a). Guingamp cuntinueghja è, in un tempu forte, u ballò viaghja in u spaziu di penalità di l’ACA. Nantu à u contru, Jabol lancia Sakhi ma a ripresa di l’anzianu ghjucadore d’Auxerre passa à cantu a cabia di Basilio (55a). L’ACA lascia passà a timpesta è marca una seconda volta. Dopu à u tiru direttu nantu à u fiancu drittu, Jacob mette un ballunettu davanti à u primu palu, B. Touré chì venia di entre, u mette in a rete di Basilio (66a). I Brittoni cercanu à reagisce ma sò l’Aiaccini ch’anu da chjode issa partita. À a seguita d’un contru, Sakhi centru per Touré chì marca per a seconda volta (76a). I Brittoni sò di capu ind’a conca. In fine di partita è dopu à un gattivu colpu nantu à Puch, Siwe hè cacciatu da l’arbitru. Una bella vittoria per l’ACA nanzu d’andà in Laval a settimana chì vene.
Stadiu François Coty
ACA-Guigamp (1-0)
Tempu piuviscosu è fretu
Spettatori: 2000 à pocu pressu
Terrenu grassu
Arbitru: M. Paradis
Arbitri laterali: . Benkhemouche è Courbet
Realisazione:
Ibayi (27a n.p.), B. Touré(66a è 76a)
Avertiti
ACA: Chanot (45+1), Ibayi (57a), Puch (84a)
Guingamp: Manceau (74a)
Spulsione: Guingamp: Siwe (90a)
ACA
Michel- Youssouf (Campanini 90a), Chanot, Avinel, Quemper- Sakhi, Mangani (cap.), Jabol (Puch 80a, Vidal 90a) Jacob ( A. Touré 80a)- Touzghar, Ibayi (B.Touré 66a)- add: O. Pantaloni
Guingamp
Basilio (cap.)- Sivis (Maronnier 58a), Riou, Lemonnier, Manceau- Merghem (Luvambo 77a), Louiserre, Lobry (Roux 77a) Sagna (Picard (58a)- El Ouazzani, Guillaume (Siwe 70a)- Add: S.Dumont
