Dopu à un maccione, i partenarii di Yohan Cavalli anu battutu à Le Havre vennari in Timizolu (3-2). Una prestazione, malgratu una debulezza à l’ora di ghjocu, d’un nivellu abbastanza altu da cunfermà per a seguita di u campiunatu.
Più di 200 CRS in giru à u stadiu di Timizolu, una certa pressione messa da a stampa di Nurmandia, mintuendu, torna una volta, « l’evenimenti » di maghju scorsu mentre chè Oswald Tanchot ne vulia più sente parlà -o guasgi-, un serviziu d’ordini degnu d’un primu ministru per Vincent Volpe, u presidente di u Havre, eccu ciò chì fù, u cuntestu di u macciu ACA-Le Havre vennari scorsu. E duie squadre si ritruvavanu quattru mesi dopu à i play-of ch’avianu fattu tantu parlà. A pressione era, à l’iniziu, piuttostu in e ghjambe aiaccine è nurmande. I primi stavanu à a 17a piazza di a classifica. ? È i secondi, benchè 7mi, avianu persu in casa soia una settimana nanzu di fronte à Béziers (2-3). Tandu, à issu nivellu quì, si pudia parlà di pressione. Micca in altrò !
In fattu, a risposta hè ghjunta da u terrenu. I vinti dui attori anu datu l’esempiu ind’una partita d’omi ma sempre ghjucata in u spiritu. Per prova, solu duie cartuline gialle (una per ogni squadra). Issu macciu s’hè sviluppatu in trè parte. Un ritimu abbastanza altu d’intrata, una bella pressione di l’Aiaccini nantu à u so avversariu, è, malgratu duie o trè azzione periculose di Fontaine o Bonnet, una fine di primu tempu dighjà decisiva . Quì l’ACA marcherà duie volte (Gimbert 39a è sopratuttu Tramoni 45a) per piglià, di manera logica, a suprana nanzu à a pausa. Subbitu dopu à a ripresa, l’ACA marca una terza volta (magnificu stucciu di Nouri 48ma). Pochi tempi dopu, Gimbert t’hà a balla di 4-0 in i so pedi ma mancherà a so sfida davanti à Thuram. Peccatu chè in a seguita, Mory riesce à mette un ballò strasordinariu da sopra à Leroy (57ma), l’ACA dubbiteghja qualchì tempu è Bain ne prufita par marcà È ne semu à 3-2 dopu un’ora di ghjocu (à pocu pressu). Peccatu chè u macciu paria ghjucatu. In fine, in terza parte, l’ACA tene u so resultatu è si piglia trè punti chì li permettenu d’alluntanà si da a fine di a classifica. U cuntinutu, forse, u più bellu dapoi u principiu di a stagione cù tuttu ciò chè ci vulia per vince. Nulla à dì nantu à u « cunstestu corsu », peccatu per Oswald Tanchot, Vincent Volpe è è i ghjurnalisti di Nurmandia. …
