Ghjè un macciu particulare ch’aspetta l’ACA issu vennari in Le Havre. Ancu s’è e partite eranu, nanzu, speciale trà e duie squadre-ci vole à ramintà si l’affare di u vulcanu, e baruffe quallà o e “piulate” di a LFP per ciò chì tocca à e suspensione- anu, dapoi u mese di maghju scorsu, francatu un passu…
À dilla franca, imbusca spurtiva, ci ne serà pocu è micca, issu vennari sera à u stadiu Océane di u Havre per a vintinovesima ghjurnata di Lega dui. D’un cantu, una squadra nurmanda decesima (39 punti) è abbastanza luntana di a cinquesima piazza (ottu punti), è, da l’altru l’ACA tredecesimu (34 punti) vicinu di u so mantenimentu (ottu punti d’avanza nantu à Sochaux). Ma, dapoi qualchì annu, una rivalità chì hè cresciuta è un macciu da veru particulare. Ci ramintaremu di u 20 di maghju scorsu è issu macciu chì hà fattu parlà – è scrive- tantu-. Dapoi issa partita, e relazione- dighjà tese nanzu- ùn sò più listesse. Hè vera chè dapoi deci anni, n’avemu vistu cose, sopratuttu quallà, ch’ella sia in Jules Deschaseaux o à u stadiu Océane. Ci hè stata a partita di u 2009 cù una prima baruffa generale è cartuline rosse è gialle à pacchettu, l’affare di u vulcanu à u ritornu è un’altra in u 2015, cù, torna una volta, baruffa è minacce. Sta volta, l’ACA hè dinò aspettatu, l’avemu vistu nantu à e rete suciale. A maiò parte di i ghjucadori di e duie squadre eranu dighjà quì di maghju scorsu è ancu à l’occasione di u primu macciu d’ottobre scorsu (vittoria di l’ACA 3-2). “Hè, di sicuru un macciu particulare, spiega Olivier Pantaloni, l’addestradore aiaccinu, ma l’avemu appruntatu cum’è l’altri. Ùn ci vole micca à scurdà si di u nostru scopu. Manca pocu, forse sei punti per assicurà u mantenimentu. Per u restu, sapemu ciò chì ci aspetta quallà. Tocca i ghjucadori chì t’anu a sperienza di gestisce à l’altri è di fà u necessariu per stà, ghjustapuntu, in u macciu. Feremu u megliu per piglià omancu un puntu.” Un cuntestu, certu, particulare ma a vulintà, per i Bianchi è rossi, di francà, pocu impreme l’avversariu, un passu ver di u mantenimentu. Per l’onore, trè punti saria quantunque una bona…
