Appena retrogradatu amministrativamente in Naziunale da a DNCG di a LFP, l’Aiacciu hè statu esclusu stu mercuri da tutte e cumpetizione naziunale in 2025-26 da a DNCG di a FFF. U club corsu duverà riparte à u liveddu amatore.
A decisione hè ferma ma micca definitiva. Dopu à a retrogradazione amministrativa in Naziunale, a Cummissione Federale di cuntrollu di i club di a DNCG hà pronunziatu stu mercuri un’avisu d’esclusione da e cumpetizione naziunale per a staghjone 2025-2026 per l’AC Aiacciu.
U club corsu hà avà sette ghjorni per fà appellu contr’à a decisione, cosa ch’ellu duverebbe fà in l’ore chì venenu. S’ella era cunfirmata, l’AC Aiacciu duverebbe riparte da u liveddu amatore.
Un bilanciu insufficiente
Sta decisione di l’istanza di a FFF ghjunge qualchì ghjornu dopu à una prima retrogradazione amministrativa da a Ligue 2 versu u Naziunale da a DNCG di a LFP. U club avia tandu annunziatu di ùn pudè adire à u CNOSF, per mancanza di mezi.
« U club ùn hè in misura di adire à u CNOSF, u cui termine scadia oghje à 17 ore », avia precisatu l’ACA u mercuri scorsu. « I dirigenti travaglianu per prisentà un bilanciu chì li permetta di ghjucà in Naziunale 1 per prutege u statutu prufessiunale ».
Ma u bilanciu ùn hè statu ghjudicatu abbastanza solidu da u gendarmu finanziariu di u ballò amatore. Sicondu l’elementi di Corse Matin, u club hè cunfruntatu à un deficit di più di 13 milioni d’euri è ùn serà micca in misura d’onurà una scadenza impurtante cù l’amministrazione fiscale à a fine di u mese.
Versu una staghjone di Naziunale à 17?
Prima ancu di l’annunziu di stu mercuri, u FC 93 Bobigny avia dighjà aditu u tribunale amministrativu per ripiglià a piazza lasciata vacante da i Corsi in Naziunale. Sicondi di u so gruppu di Naziunale 2 l’annu passatu, i Franciliani sò i primi ripescabili in casu di retrogradazione d’un club.
Salvu chì l’istanze di u ballò s’adattinu cù un campiunatu à 17 club, ciò chì hè prubabile sapendu chì a N1 hà dighjà principiatu u weekend scorsu.
