Qualificatu à l’ultimu mumentu per l’Open d’Australia dopu à u rinucinamentu di l’Inghlese Liam Brody, l’atletu isulanu hè statu custrettu d’abandunà à l’occasione di u so primu macciu contru à u Talianu Federico Gaio à u principiu di u terzu set mentre chè i dui ghjucadori eranu à parità. Vittime di granchi, Lokoli ùn participerà micca à a fasa finale
U fisicu hà avutu ragiò di a determinazione di Laurent Lokoli à l’Open d’Australia. U tennista corsu ghjucava contru à u Talianu Federico Gaio à l’occasione di u primu macciu di qualifcazione è ùn hà pussutu andà sin’à a fine di u so macciu. Eppuru a partita era abbastanza incerta quandu l’atletu isulanu, vittime di granchi, hè statu custrettu d’abandunà. i dui ghjucadori eranu à parità dopu à dui set assai (6-4, 4-6). U Talianu vincia 3-2 in u terzu. « Ùn pudiu più move, spiega Laurent Lokoli, Era troppu difficiule per mè di cuntinuà, i dulori m’anu custrettu d’abandunà è di rinuncià à a seguita di u percorsu. Peccatu ch’aspettava monda d’issa cumpetizione, una di e quattru più impurtante di u mondu. M’aghju da curà per esse prontu u più prestu pussibile. »
U ghjucadore di 29 anni, ch’ùn avia micca a classifica necessaria per participà ci, avia ottenutu u so biglettu per l’Australia dopu à u rinunciamentu di l’Inghlese Liam Brody. Lokoli avia marcatu a ghjustra di Wimbledon di lugliu scorsu perdendu contru à u Norvegianu Casper Ruud (quartu mundiale à l’epica à l’ATP) in quattru set (1-6, 7-5, 4-6, 3-6) dopu una bella lotta. Di ghjennaghju scorsu, Laurent Lokoli avia persu à u primu giru di l’Open d’Australia contru à Michaël Mmoh. L’atletu isulanu hè classificatu à a 167a piazza à l’ATP
