Malgratu una belle prestazione di Bastelicaccia, u SCB hà vintu di manera logica, sabbatu in Mezavia (2-0). Una vittoria chì li permette di piglià torna una avanza in capu di a classifica…
Ùn hè cusì faciule, quandu una squadra hè favurita d’un campiunatu, di mantene d’un capu à l’atru di l’eserciziu, issu statutu. I Bastiacci anu « pacatu » u prezzu l’ottu di settembre scorsu in Aubagne. A sola scunfitta dapoi u princupiu di u campiunatu. Sabbatu, in Mezavia (u GFCA avia imprestatu e so stallazione), Bastelicaccia « ricivia » u Sporting. I Bastiacci anu pocu suffertu, à dilla franca. È senza ghjucadori maiò (Genest, Bocognano, Santelli, Santini), anu tenutu u so statutu. Una suprana, di u capu à l’altru di u macciu è subbitu a pressione nantu à i ghjucadori di Jean-Luc Luciani. I « rossi » anu cercatu à ghjucà in difesa è lascià pochi spazii à i so avversarii. È ci hè vulsutu appena di furtuna à i « Turchini » per marcà i primi. Un calciu d’angulu, un ballò chè nimu ùn hà pussutu sgagià è Kévin Schur chì l’hà messu sottu à a traversa (23e). Si pensava chè u più duru era fattu per u Sporting, ma, un ballò di Porri nantu à u pallu bastiacciu à qualchì mumentu di a pausa, hà mustratu chè issu macciu ùn era ghjucatu.
In secondu tempu, l’omu di a partita serà Graziani. À ellu solu, u purtieru di Bastelicaccia, hà cacciatu tuttu, tinendu a so squadra in u macciu. Dopu à occasione è à rombu di rinculà i « Rossi » anu piegatu una seconda volta dopu à un stuccione di Vincent, à une quartu d’ora di a fine. In fine, una vittoria logica chì permette à I “Turchini” di mantene u ritimu in capu di a classifica cù cinque punti d’avanza nantu à Aubagne. Bastelicaccia hè, per contu soiu, dodecisima…
