Anthony Lippini serà u novu allenatore di l’AC Aiacciu per sta stagione. L’anzianu difensore biancu è rossu piglierà e so funzioni ghjovi l’11 di settembre è averà per missione di ricustruisce u club aiaccinu chì ghjucherà avà in Régionale 2.
Dopu à un’estate d’incubu è una calata à l’infernu chì paria ùn finisce più, l’AC Aiacciu si rialeva pianu pianu è si rimette in piazza. Dopu à l’elezzione, eri, d’un novu presidente à a testa di l’Associazione, u club aiaccinu hà annunziatu oghje u nome di u so novu allenatore.
Senza sorpresa, si tratta d’Anthony Lippini. L’anzianu difensore di l’AC Aiacciu, chì hà ghjucatu 123 partite cù a maglia Biancu è Rossu, piglierà dunque e redine di a prima squadra. Una squadra chì, per ricurdà, ghjucherà st’annu in Régionale 2 è principierà u so campiunatu u 5 d’ottobre nantu à u terrenu di l’AS Furiani-Agliani.
Hè a prima volta ch’Anthony Lippini allena una squadra di seniori. Un bellu sfida per stu ghjovanu allenatore chì, l’annu scorsu, cunduceva l’U17 naziunali di l’ACA. Squadra cù a quale hà riesciutu l’impresa di finisce à a prima piazza !
Primu appuntamentu per Anthony Lippini, ghjovi 11 di settembre, per u primu allenamentu ufficiale di a prima squadra aiaccina.
