Membre di u Tennis Club di Mezavia, Alice Battesti, quattordeci anni, principia, issu vennari in Tarbes, a ghjustra « Les petits As ». Una cumpetizione chì addunisce ghjucadori di e categorie 12-14 anni di u mondu sanu. L’occasione, per l’Aiaccina, di cunfirmà u so talente à mezu à ciò chì si face di megliu…
In Corsica per ciò chì tocca à u Tennis, t’avemu à Chloé de Bernardini è di sicuru; Laurent Lokoli. Ma daretu, l’Aiaccina Alice Battesti, face, à pocu à pocu, a so strada à mezu à i maiò. È t’averà, d’altronde, l’occasione di fà si valè durante una decina di ghjorni postu ch’ella hè pertuta in Tarbes, participà à a ghjustra « Les petits as ». Una cumpetitizione maiò dedicata à i zitelli di 12-14 ma di u mondu sanu. A zitella hà ottenutu u so bigliettu dopu avè vintu in Antibes, di dicembre scorsu. Membre di u Mezavia TC, Alice, scularizata à u culleghju Giovoni d’Aiacciu, hà fattu prugressi tamanti iss’ultimi mesi. « Les petits as » hè una ghjustra induve anu participatu parechji ghjucadori famosi: Murray, « Djoko », Nadal, Federer. Vale à dì, d’una certa manera, una cumpetizione mundiale di i 12-14 anni. Pertuta dopu à una preparazione maiò (à u CSJC) cù a so furmatrice Chloé Carlotti, Alice Battesti vole seguità a so stella è francà, per a so prima participazione, u primi giru. Saria dighjà una bona nanzu di sperà megliu…
